არაადამიანურ მოპყრობაში ბრალდებული მარნეულის ყოფილი მერი რუსთავის სასამართლომ გაამართლა. თემურ აბაზოვის გამამართლებელი განაჩენი დღეს, 12 თებერვალს გამოიტანა.

თემურ აბაზოვი On.ge-სთან საუბრისას აცხადებს, რომ სასამართლოს მსვლელობისას 100-მდე მოწმე დაიკითხა, რომლებმაც ვერ წარადგინეს მტკიცებულებები მის წინააღმდეგ. მისი თქმით, აქედან გამომდინარე მოსამართლემ ის უდანაშაულოდ ცნო.

აბაზოვი ამბობს, რომ პოლიტიკურ კარიერაზე ჯერ გეგმები არ აქვს, რადგანაც განაჩენი ახლახანს გაიგო. მისივე თქმით, არ ჰქონია კონტაქტი ქართული ოცნების თავმჯდომარე ბიძინა ივანიშვილთანაც, რომელმაც ის ადრე მარნეულის მერად დაასახელა.

არაადამიანური მოპყრობის ბრალდებით აბაზოვი 2018 წლის 13 ივნისს დააკავეს, მას შემდეგ, რაც სტუდია მონიტორის საგამოძიებო მასალა გავრცელდა. მასალაში ასახული იყო, რომ მოქალაქე, რომელმაც საქართველოს ყოფილ პრემიერს, ბიძინა ივანიშვილისა და მარნეულის მერს, თემურ აბაზოვს აგინა და ძალადობის მსხვერპლი გახდა.

პროკურატურა აცხადებდა, რომ ამ პირს აბაზოვმა სახეში შეაფურთხა, მიაყენა ფიზიკური შეურაცხყოფა, აიძულა მოეშარდა ჭიქაში და შარდით მოებანა სახე. თავდაპირველად, გამოძიება ჯგუფურად განხორციელებული არაადამიანური და დამამცირებელი მოპყრობის ფაქტზე დაიწყო. მოგვიანებით ბრალდებას პირადი ცხოვრების ამსახველი მასალის მოპოვება, ორგანიზება, ინტერნეტითა და სოციალური ქსელებით გავრცელება დაემატა.

10 000-ლარიანი გირაოს სანაცვლოდ საპატიმრო დაწესებულების დატოვების შემდეგ აბაზოვმა სამსახურში განაცდურის სახით 32 000 ლარის ანაზღაურება მოითხოვა, რაზეც მარნეულის მერიისგან უარი მიიღო.

თემურ აბაზოვი ბრალს არ აღიარებს. ის აცხადებდა, რომ ბინძური პროვოკაციების მსხვერპლია.