ქართული ოცნების გენერალური მდივანი და თბილისის მერი, კახა კალაძე სტრასბურგში ევროპარლამენტარებთან შეხვედრებს "ძალიან ნაყოფიერად" აფასებს. მისი თქმით, მეგობრებს ქვეყანაში არსებულ პოლიტიკურ მდგომარეობაზე ინფორმაცია მიაწოდეს. კალაძის კომენტარს ქართული ოცნების პრესსამსახური ავრცელებს.

"ვისაუბრეთ ასოცირების ხელშეკრულებით ნაკისრ ვალდებულებებზე, ასევე, ქვეყანაში მიმდინარე პოლიტიკურ პროცესებზე. ბევრი კითხვა დაისვა და რა თქმა უნდა, ჩვენი მხრიდან გაკეთდა ახსნა-განმარტებები. რაც შეეხება არჩევნებს, ხაზი გავუსვით, რომ ყველაფერს გავაკეთებთ, რათა არჩევნები ჩატარდეს თავისუფალ, მშვიდობიან გარემოში გამჭვირვალედ, რათა ყველა პოლიტიკურ პარტიას, ყველა პოლიტიკურ სუბიექტს ჰქონდეს შესაძლებლობა თავისუფალ გარემოში წარუდგინოს საკუთარი ხედვები მოსახლეობას და ჩაატაროს საარჩევნო კამპანია", — აცხადებს კალაძე.

ქართული ოცნება-დემოკრატიული საქართველოს გენერალური მდივანი, კახა კალაძე და აღმასრულებელი მდივანი, ირაკლი კობახიძე სამუშაო ვიზიტით სტრასბურგში იმყოფებიან.