ყოფილი პრეზიდენტი, გიორგი მარგველაშვილი ყოფილ თანაგუნდელებს მოუწოდებს, რომ ქვეყნის "დასავლური არჩევანის" დასაცავად გააქტიურდნენ. მარგველაშვილმა გიორგი კვირიკაშვილის პოზიცია მოიწონა და გააქტიურებისკენ ირაკლი ალასანიასაც მოუწოდა.

"მე ძალიან მომწონს ხოლმე, რომ კრიტიკულ მომენტებში გიორგი [კვირიკაშვილი] ძალიან სწორ პოზიციას იკავებს. ძალიან მიხარია, რომ მიუხედავად იმისა, რომ აქტიურ პოლიტიკაში არ არის, როგორც მოქალაქე და როგორც ამ ქვეყნის პრემიერ-მინისტრი, რომ ძალიან მძიმე ვითარებას პოზიციის დაფიქსირების გარეშე არ ატარებს. მივმართავ იმ ადამიანებს, ვისაც 2012 წლამდე ერთად ვიდექით, ვიღაცები მთავრობაში წახვედით, ვიღაცები გადადექით, მაგრამ დღეს ჩვენი დასავლური არჩევანია დასაცავი. არ ვიცი, ალასანიას მივმართავ", — განაცხადა გიორგი მარგველაშვილმა TV პირველის ეთერში.

მარგველაშვილმა, ასევე, მოუწოდა პრეზიდენტ სალომე ზურაბიშვილს, რომ გამოიყენოს მისი კონსტიტუციური უფლება და პოლიტპატიმრები გამოუშვას, რითიც "თავს ააცილებს ქვეყანაში პოლიტიკურ დაძაბულობას".

ყოფილი პრემიერ-მინისტრი, გიორგი კვირიკაშვილი ოპოზიციის ლიდერის, გიგი უგულავას დაკავებას ეხმაურება. იგი ამ ფაქტს აფასებს, როგორც "მართლმსაჯულების პოლიტიკური მიზნით გამოყენებად" და "დემოკრატიულ კურსზე უარის თქმად".

თბილისის ყოფილ მერსა და ოპოზიციის ერთ-ერთ ლიდერს, გიგი უგულავას პატიმრობაში ყოფნა ისევ 3 წლით, 2 თვითა და 8 დღით მიუსაჯეს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა. საკასაციო საჩივარი ყოფილმა გენერალურმა პროკურორმა და ახლადარჩეულმა მოსამართლემ შალვა თადუმაძემ განიხილა. მასთან ერთად შემადგენლობაში იყვნენ მოსამართლეები, მერაბ გაბინაშვილი და გიორგი შავლიაშვილი.