საგანგებო სიტუაციების მართვის სამსახურის ინფორმაციით, მწვერვალ თეთნულდზე ზვავი ჩამოწვა, რომელმაც ტურისტები მოიყოლა.

უწყების ინფორმაციით, მაშველებმა ჩეხი ტურისტის გადარჩენა შეძლეს. ის მესტიის საავადმყოფოშია გადაყვანილი. შემთხვევის ადგილზე კიდევ ერთი ადამიანის საძიებო ოპერაცია მიმდინარეობს.

გარემოს ეროვნული სააგენტოს პროგნოზით, 11 თებერვალს საქართველოში უნალექო ამინდი და ღამის საათებში ძლიერი ყინვებია მოსალოდნელი, ხოლო კოლხეთის დაბლობზე ღამის საათებში ჰაერის ტემპერატურა -5,-8 გრადუსამდე დაეცემა.

12 თებერვალს დღის მეორე ნახევრიდან 13 თებერვლის დილამდე დასავლეთ საქართველოში და აღმოსავლეთ საქართველოს დასავლეთ ნაწილში მოსალოდნელია ნალექი, მთაში და მაღალმთაში თოვლის სახით, ზოგან ძლიერი, ზღვაზე 4-5 ბალიანი შტორმი, მაღალმთაში ზოგან ნისლი, ქარბუქი და ზვავსაშიშროება.