კორონავირუსით გარდაცვლილთა რიცხვმა SARS-ის ეპიდემიის დროს გარდაცვლილთა რაოდენობას გადაასწრო. BBC-ის ინფორმაციით, 2003 წელს SARS-ის ეპიდემიის დროს ჩინეთსა და 20-ზე მეტ ქვეყანაში 774 ადამიანი გარდაიცვალა.

ბოლო მონაცემებით, კორონავირუსის გამო 813 ადამიანი გარდაიცვალა, აქედან ორი ჰონგ-კონგსა და ფილიპინებში. დაინფიცირებულთა რიცხვი კი 37 ათასამდე გაიზარდა. გარდაცვლილთა და ინფიცირებულთა უდიდესი ნაწილი ჩინეთის პროვინცია ჰუბეიდანაა.

8 თებერვალს ჩინეთში დაფიქსირდა აშშ-სა და იაპონიის მოქალაქეების სიკვდილის პირველი შემთხვევა. აშშ-ს მოქალაქე უხანის საავადმყოფოში გარდაიცვალა. ასევე, უხანში გარდაიცვალა 60 წელს გადაცილებული იაპონელი კაცი.

გარდა ამისა, ვირუსის შემთხვევები დაფიქსირდა აღმოსავლეთ საფრანგეთში, სათხილამურო კურორტთან. ადგილზე დიდი ბრიტანეთის ხუთ მოქალაქეს კორონავირუსი დაუდასტურდა, რის შედეგადაც 2 სკოლაში სწავლა შეწყდა. ინფიცირებულთა შორის ერთ-ერთი სტუდენტია.

დაღუპულთა შორისაა ექიმი ლი, რომელსაც გმირად მიიჩნევენ. მან პირველმა ატეხა განგაში მოსალოდნელ ეპიდემიაზე, თუმცა არავინ უჯერებდა. ექიმი ლი ამავე დაავადებით 6 თებერვალს გარდაიცვალა. მას პაციენტისგან გადაედო დაავადება.