როგორც კულტურის სამინისტროდან On.ge-სთვის მოწოდებული ინფორმაციით ირკვევა, ღონისძიებისთვის, რომელიც 1 საათსაც არ გაგრძელებულა, სპეციალურად დააგეს პოდიუმი, რბილი იატაკი, ასევე, დაამზადეს ბანერების ჩამოსაკიდი ლითონის კონსტრუქციები და ხის მაგიდა. აღნიშნულის მონტაჟისა და შემდგომ დემონტაჟისთვის მუშებს გადაუხადეს 960 ლარი, ტრანსპორტირებას დასჭირდა 450 ლარი, გენერატორის იჯარა - 1 160 ლარი, ლედ მონიტორის იჯარა - 2 800 ლარი. ამ და სხვა ხარჯებმა ჯამში 13 ათას ლარს გადააჭარბა.

ჩვენ დავუკავშირდით კულტურისა და ძეგლთა დაცვის სამინისტროს მედიაკომუნიკაციის სამმართველოს უფროს ქეთი ებანოიძეს, რომელსაც ვკითხეთ, რატომ არ გაიმართა აღნიშნული პრესკონფერენცია კულტურის სამინისტროს რომელიმე საკონფერენციო დარბაზში. აღნიშნულზე ქეთი ებანოიძემ გვიპასუხა:

“რომ არ ყოფილიყო ასოცირებული მხოლოდ ერთ უწყებასთან და რომ დაფიქსირებულიყო როგორც მთავრობის ინიციატივა და არა მხოლოდ კულტურის სამინისტროსი. ეს არ არის მხოლოდ კულტურის სამინისტროს პროექტი და არ მოიცავს მხოლოდ კულტურას. ამ პროექტში რამდენიმე უწყებაა ჩართული, მათ შორის ეკონომიკის სამინისტრო, ტურიზმის ეროვნული სააგენტო. შესაბამისად, გადაწყდა, რომ პრეზენტაცია გაკეთებულიყო ნეიტრალურ ტერიტორიაზე და ეს ადგილი ამიტომაც შეირჩა”.

On.ge-მ ქეთი ებანოიძეს ასევე ჰკითხა, სამინისტრომ რატომ გადაწყვიტა დაუსრულებელ, სარემონტო შენობაში ამ პრესკონფერენციის ჩატარება და რატომ არ შეირჩა ისეთი ადგილი, სადაც უფრო ხელსაყრელი გარემო იქნებოდა.

კულტურის სამინისტროს პრესსამსახურის ხელმძღვანელის თქმით, გადამწყვეტი ფაქტორი შენობის შერჩევისას ვიზუალმა იმოქმედა:

ჩვენ შევეცადეთ გაგვერკვია, საშუალოდ რა ღირს თბილისის სასტუმროებში 100 კაცზე გათვლილი ეკრანიანი საკონფერენციო სივრცის დაქირავება. 1 საათით მსგავსი საკონფერენციო დარბაზის დაქირავება თბილისი მარიოტში 600 ლარი, ხოლო ქორთიარდ მარიოტში 500 ლარი ჯდება. რაც შეეხება რადისონ ბლუ ივერიას, აქ ანალოგიური დარბაზის ქირავნობის ღირებულება დაახლოებით 1 500 ლარია, სასტურმო რუმსში - 900 ლარი, თუმცა ფასები ღონისძიების თარიღის ცვლილებასთან და დამატებით სერვისთან ერთად იცვლება. აღნიშნულ თანხებს ემატება დღგ-ს გადასახადი.

პროექტი Check in Georgia სამთავრობო პროექტია, რომლისთვისაც მთავრობის სარეზერვო ფონდიდან 29 მილიონამდე ლარია გამოყოფილი. პროექტის ფარგლებში საქართველოში მთელი წლის განმავლობაში სხვადასხვა გასართობი ღონისძიებებია დაგეგმილი, მათ შორის რობი უილიამსის, Maroon 5-ის, ხოსე კარერასის, ეროს რამაზოტისა და სხვების კონცერტები.