დაავადებათა კონტროლის ცენტრის ხელმძღვანელი ამირან გამყრელიძე ქალაქების მერიებს, საჯარო და კერძო დაწესებულებებსა და მედიებს კორონავირუსის პრევენციისთვის დახმარებას სთხოვს. ის სწორი ინფორმაციის გავრცელებისა და სადეზინფექციო საშუალებების მომარაგებისკენ მოუწოდებს, როგორც საზოგადოებრივი თავშეყრის ადგილების ხელძღვანელებს, ასევე, საგანმანათლებლო დაწესებულებებს.

გამყრელიძე განმარტავს, რომ სანამ კორონავირუსის საფრთხე არსებობს, პრევენციის მექანიზმები მნიშვნელოვანია, ცნობიერების ამაღლება კი ყველაზე ეფექტურია. ამიტომ, ის მოუწოდებს ქალაქების მერიებს, რომ საზოგადოებრივ ტრანსპორტში გამოყონ სარეკლამო ადგილები რეკომენდაციების გასავრცელებლად.

"მივმართავ დიდი ქალაქების მერიებს, პირველ რიგში, რა თქმა უნდა, თბილისის მერიას. უამრავი ადამიანი გადაადგილდება საზოგადოებრივი ტრასნპორტით, ავტობუსებით, მეტროთი და ტაქსებით. თუ შესაძლებელია, ამ პერიოდში დავუთმოთ გარკვეული სარეკლამო ადგილები იმ გაფრთხილებებსა და გზავნილებს, რასაც ვავრცელებთ. მეტროში და ავტობუსში ყოფნისას, როგორც წესი ადამიანები კითხულობენ და ეს კარგად აპრობირებული მეთოდია", — აღნიშნა მან.

გარდა ამისა, მან სთხოვა მედიებს, სურვილის შემთხვევაში, გააშუქონ ან სოციალურ რეკლამად გაუშვან რეკომენდაციები.

"მედიების უმრავლესობა არის კერძო და ჩვენ არავითარი უფლება არ გვაქვს ვინმეს რამე დავავალოთ, ჩვენ შეგვიძლია მხოლოდ ვთხოვოთ მათ. თუ შესაძლებელია, ამ მდგომარეობაში ვისარგებლოთ და ის აუცილებელი ინფორმაციები, რომლებიც ძალიან ბევრია ჩვენს ვებ-გვერდზე, განსაკუთრებით ინფექციის კონტროლთან დაკავშირებით, რომელიც გახლავთ მთავარი ღონისძიება, როგორც სოციალური რეკლამა, პერიოდულად გაუშვით ხოლმე თქვენს გადაცემებში", — განაცხადა მან.

გამყრელიძემ სამედიცინო, სახელმწიფო და კერძო დაწესებულებებს, ასევე, იმ სივრცეების ხელმძღვანელებს, სადაც საზოგადოებრივი თავშეყრის ადგილებია სთხოვა, რომ მაქსიმალურად შეეცადონ სადეზინფექციო საშუალებებით მომარაგება.

"განსაკუთრებით მინდა მივმართო საგანმანათლებლო დაწესებულების ხელმძღვანელებს, ბაგა-ბაღებს, სკოლებს და უმაღლეს საგანმანათლებლო დაწესებულებებს, რომც არ იყოს საშიშროება კორონავირუსული ინფექციის, გრიპის სეზონია ქვეყანაში და რესპირატორული ინფექციებისგან თავის დაცვის ყველაზე კარგი საშუალება არის სწორი ჰიგიენური საშუალებების დაცვა", — განაცხადა მან.

ჩინეთის დაავადებათა კონტროლის ცენტრის 7 თებერვლის მონაცემებით, დაფიქსირებულია კორონავირუსის 3 143 ახალი შემთხვევა, მათგან 962 მძიმედ მწვავედ მიმდინარე. ბოლო მონაცემებით, სულ ლაბორატორიულად დადასტურებულია 31 161 შემთხვევა, საიდანაც გარდაცვლილია 636 და გამოჯანმრთელებული —1 540.

ახალი კორონავირუსის დიაგნოსტირება უკვე საქართველოშიც შესაძლებელია. ამ ეტაპზე საქართველოში ვირუსის არცერთი შემთხვევა არ დაფიქსირებულა.

გაიგეთ მეტი