უმრავლესობის ყოფილი დეპუტატი, თამარ ჩუგოშვილი ამბობს, რომ არარეალურია პარტია მესამედ იღებდეს მონაწილეობას არჩევნებში და ხმების 60%-ზე ჰქონდეს განაცხადი. ეს განცხადება დეპუტატმა ირაკლი კობახიძის საპასუხოდ გააკეთა. პარლამენტის ყოფილმა თავმჯდომარის, ირაკლი კობახიძის გათვლებით, არჩევნებში ქართულ ოცნებას ყოველი მეორე ამომრჩეველი დაუჭერს მხარს.

"მესამე ვადაზე არჩევნებში მონაწილეობა მიიღოს პარტიამ და თან ამბობდეს, რომ ეს დემოკრატიული არჩევნებია და თან 60%-ზე ჰქონდეს განაცხადი ერთმანეთთან შეუთავსებელია", — თქვა თამარ ჩუგოშვილმა მთავარ არხთან საუბრისას.

ირაკლი კობახიძემ აღნიშნა, რომ პარტიის შიდა კვლევები იმის წინაპირობას იძლევა, რომ მმართველი პარტია 2016 წლის შედეგს გაიმეორებს. მისი თქმით, ექსპერტების პროგნოზი, რომ ქართული ოცნება, 2020 წლის საპარლამენტო არჩევნებზე ხმების 60%-ს ვერ აიღებს არ გამართლდება.