პარლამენტის დამოუკიდებელი დეპუტატი, ლევან კობერიძე ამბობს, რომ ყოფილი თავმჯდომარე ირაკლი კობახიძე მოსახლეობას "ტროლავს", რადგან არჩევნებში მაღალი შედეგის მიღებაზე საუბრობენ.

"პრემიერ-მინისტრი გიორგი გახარია საუბრობს იმ ენით, რომ უნდა დაასპოილეროს მოსახლეობა, ირაკლი კობახიძე ეტყობა ტროლავს. რა 60 პროცენტზე საუბრობენ? თავს იმხნევებენ ან ბიძინა ივანიშვილს აჩვენებენ, რომ მხნედ ვართო", — აღნიშნა კობერიძემ მთავარ არხთან.

პარლამენტის ყოფილი თავმჯდომარის, ირაკლი კობახიძის გათვლებით, საპარლამენტო არჩევნებში ქართულ ოცნებას ყოველი მეორე ამომრჩეველი დაუჭერს მხარს. მისივე თქმით, პარტიის შიდა კვლევები იმის წინაპირობას იძლევა, რომ მმართველი პარტია 2016 წლის შედეგს გაიმეორებს.

"ჩვენი პროგრამა მინიმუმია, რომ ყოველმა მეორე ამომრჩეველმა მოგვცეს ხმა. დანარჩენი ყველაფერი დამოკიდებულია ჩვენს მუშაობაზე", — განაცხადა კობახიძემ.

2016 წლის საპარლამენტო არჩევნებში ქართულმა ოცნებამ 48,7 პროცენტი მიიღო, რითაც პარლამენტში საკონსტიტუციო უმრავლესობა მოიპოვა. კობახიძემ მმართველი პარტიის შედეგების გამეორებაზე იმის ფონზე ისაუბრა, როცა კვლევებში ქართული ოცნების რეიტინგი ოპოზიციის საერთო რეიტინგს ჩამოუვარდება.