კორონავირუსის შედეგად გარდაცვლილთა რაოდენობა 213-მდე გაიზარდა. ამავე დროს, დაინფიცირებულთა რიცხვმა 9 692-ს მიაღწია, აქედან 90 ჩინეთს გარეთ, 19 ქვეყანაში დაფიქსირდა. ამის შესახებ ინფორმაცია დღეს, 31 იანვარს დაავადებათა კონტროლის ხელმძღვანელმა, ამირან გამყრელიძემ გაავრცელა.

მისი თქმით, ჯანდაცვის მსოფლიო ორგანიზაცია დეტალურ რეკომენდაციებს გაავრცელებს, თუმცა აქამდეც ისინი ორგანიზაციის ყველა რეკომენდაციას ითვალისწინებდნენ. გამყრელიძემ კიდევ ერთხელ აღნიშნა, რომ საქართველოში კორონავირუსის შემთხვევები არ ფიქსირდება.

ამირან გამყრელიძე ამბობს, რომ ამ ეტაპისთვის იმ კორონავირუსის სუბტიპი, რომელიც მსოფლიოშია გავრცელებული, საქართველოში ჯერ არ აქვთ, თუმცა იმედოვნებენ, რომ 4 თებერვლისთვის უკვე ექნებათ.

"მინდა კიდევ ერთხელ დავარწმუნო საქართველოს მოსახლეობა, რომ პანიკის საფუძველი ნამდვილად არ არის, თუმცა რა თქმა უნდა ჩვენ უნდა ვიყოთ სრულ მზადყოფნაში. ქვეყანა ყველაფერს აკეთებს იმისთვის, რომ თავიდან იქნეს აცილებული იმპორტი ინფექციისა, მაგრამ თუ ეს იქნა, გადაუდებელი ზომები დროულად გატარდება", — განაცხადა გამყრელიძემ.

გარდა ამისა, გამყრელიძე ამბობს, რომ გერმანიაში, აშშ-ში, ვიეტნამსა და იაპონიაში ვირუსის ადამიანიდან ადამიანზე გადადების რვა შემთხვევა დაფიქსირდა. მისი თქმით, ეს ადამიანები ჩინეთში ნამყოფი არ იყვნენ და მათ ვირუსი ჩინეთში ნამყოფი ადამიანებისგან გადაედოთ.

ამირან გამყრელიძის თქმითვე, ყველა პრევენციული ზომა ადამიანის უფლებებთან არის დაკავშირებული:

"რა თქმა უნდა, მგზავრობას თქვენ დღეს ვერ შეზღუდავთ. ღიაა საზღვრები, ამიტომ ძლიერ ასეთ შეზღუდვას აკეთებს ერთი ქვეყანა ჩრდილოეთ [რუსეთი], არ მინდა დავასახელო. ახლა ერთი ქვეყანა მსოფლიოში, რომელსაც შეუძლია თქვას, რომ მე ჩავკეტე ყველა ჩემი საზღვარი და არავის შემოვუშვებთ. დანარჩენი ქვეყნები ღია არიან, მაგრამ ატარებენ პრევენციულ ზომებს, მზად ყოფნა არის ისეთი, რომ მინიმუმამდე დაიყვანოს რისკი, ეს გარკვეულად დაკავშირებულია ადამიანის უფლებებთან, რომელიც ყველაზე ფუნდამენტური უფლებაა. ამიტომ ძალიან რთულია ამხელა ქვეყნის, ჩინეთის იზოლაციაში მოქცევა".

გუშინ ჯანდაცვის მსოფლიო ორგანიზაციამ კორონავირუსის გამო საერთაშორისო საგანგებო მდგომარეობა გამოაცხადა. ბრიფინგზე ორგანიზაციის წარმომადგენლებმა განაცხადეს, რომ ვირუსი კვლავ განაგრძობს გავრცელებას, საგანგებო რეჟიმის გამოცხადების მთავარ მიზეზად კი იმ ქვეყნების დაცვა დასახელდა, რომლებიც შეიძლება კორონავირუსთან გამკლავება თავად ვერ შეძლონ.

მსოფლიო ჯანდაცვის ორგანიზაცია საერთაშორისო საგანგებო რეჟიმს განმარტავს როგორც გამორჩეულ შემთხვევას, რომლის დროსაც "დაავადების გლობალური გავრცელება სხვა ქვეყნებისთვის საზოგადოებრივი ჯანმრთელობისთვის რისკს წარმოადგენს" და, შესაძლოა, საჭიროებდეს "კოორდინირებულ საერთაშორისო საპასუხო ქმედებას".

საერთაშორისო საგანგებო რეჟიმის გამოცხადების შემდეგ ჯანდაცვის მსოფლიო ორგანიზაციის დირექტორს, ტედროს გებრეისუსს ვირუსის გავრცელების შესაზღუდად ქვეყნებისთვის რეკომენდაციების გაცემის უფლება ეძლევა. ეს მოწოდებები, შესაძლოა, მოიცავდეს რჩევებს, მაგალითად, სასაზღვრო კონტროლის შესახებ.

ჯანდაცვის მსოფლიო ორგანიზაციის წევრებს კი 2005 წელს ჯანდაცვის საერთაშორისო რეგულაციების დოკუმენტის მიხედვით მიღებული რჩევების გათვალისწინება ევალებათ.