პარტია დემოკრატიული მოძრაობის ლიდერი, ნინო ბურჯანაძე ფიქრობს, რომ "საქართველომ ძალიანაც რომ სთხოვოს", სერგეი ლავროვი არ ჩამოვა. რუსეთის საგარეო საქმეთა მინისტრის შესაძლო ვიზიტზე ბურჯანაძემ დღეს, 29 იანვარს ჟურნალისტებთან ისაუბრა. მან, ასევე, შეაფასა პრეზიდენტ სალომე ზურაბიშვილის განაცხადი, კანონის გვერდის ავლით რუსული დელეგაციის ჩამოყვანაზე:

"პრეზიდენტის განცხადება იმასთან დაკავშირებით, რომ კანონის გვერდის ავლით რამე გაკეთდება, უკვე ძალიან დიდი უხერხულობაა. კანონის გვერდის ავლა სამართალში არ არსებობს. თუ გინდა, რომ რაღაც კორექტირება მოიტანო, ან უნდა შეცვალო, ან კანონი უნდა იძლეოდეს გამონაკლისის შესაძლებლობას. ამ გამონაკლისის შესაძლებლობას კანონი იძლევა, რაც, როგორც ჩანს, პრეზიდენტმა არ იცის".

საქართველომ, როგორც ევროპის საბჭოს მინისტრთა კომიტეტის თავმჯდომარე ქვეყანამ, ევროსაბჭოს მინისტერიალს მაისში უნდა უმასპინძლოს. მინისტერიალის ფარგლებში, შესაძლოა, რომ ქვეყანას რუსეთის დელეგაციის ისეთი წევრებიც ესტუმრონ, რომელთაც ოკუპირებული ტერიტორიების შესახებ კანონი აქვთ დარღვეული, მათ შორის შესაძლოა იყოს რუსეთის საგარეო საქმეთა მინისტრი სერგეი ლავროვიც.

ნინო ბურჯანაძე მოსკოვს პოლიტიკური მიზეზით სტუმრობს ხოლმე და იგი არაერთხელ შეხვედრია პრეზიდენტ ვლადიმერ პუტინს. დემოკრატიული მოძრაობა — ერთიანი საქართველოს ლიდერი ესწრებოდა რუსეთის ფედერაციის მიერ ორგანიზებულ ევრაზიულ ქალთა ფორუმს, რომელსაც დე ფაქტო აფხაზეთის დელეგაციაც ესწრებოდა. ნინო ბურჯანაძეს ნათქვამი აქვს, რომ რუსეთში ყველა ვიზიტზე პატრიარქს წინასწარ აყენებს საქმის კურსში.