ყოფილი სახალხო დამცველსა და ამჟამად პრემიერის მრჩეველს, სოზარ სუბარს "ძალიან სასაცილოდ" ჰგონია ის ფაქტი, რომ მოქმედი სახალხლო დამცველი პარლამენტის თავმჯდომარესა და პრემიერს მხარდაჭერას სთხოვს. ლომჯარიამ ამ თხოვნით გიორგი გახარიასა და არჩილ თალაკვაძეს დღეს მიმართა.

"სახალხო დამცველიც ადამიანია, თუ ის არაკომპეტენტურია მის მიმართაც ზუსტად ისევე შეიძლება კრიტიკის გამოთქმა, როგორც ნებისმიერი სხვა ადამიანის მიმართ. მარტო დღევანდელ სახალხო დამცველზე არ ვამბობ", — განაცხადა მან POSTV-ის ეთერში.

სუბარი ლომჯარიას აკრიტიკებს და ამბობს, რომ განცხადება იუსტიციის მინისტრის მიერ სისხლის სამართლის დანაშაულის ჩადენაზე "აბსურდია". ის ლომჯარიაზე საუბრისას თავის გამოცდილებას უსვამს ხაზს და ამტკიცებს, რომ პატიმრებთან შეხვედრებს არ მალავდა. გარდა ამისა, ის რამდენჯერმე ახსენებს ნაციონალური მოძრაობის მმართველობის პერიოდს და დღევანდელს ადარებს.

23 იანვარს პენიტენციურმა სამსახურმა გაავრცელა განცხადება, რომ ნინო ლომჯარია ციხეში ოპოზიციის ლიდერებს ხვდებოდა. მატროსოვის ციხიდან გამოსვლის შემდეგ ომბუდსმენს ჟურნალისტები დახვდნენ, რომლებსაც მან უთხრა, რომ კონფიდენციალურია იმ პატიმართა ვინაობა, ვინც მოინახულა. მანვე აღნიშნა, რომ თეა წულუკიანმა მისი ციხეში შესვლის გასაჯაროვებით კანონი დაარღვია.

24 იანვარს ომბუდსმენმა ნინო ლომჯარიამ განაცხადა, რომ მის მიმართ უკანონო თვალთვალში იუსტიციის მინისტრი თეა წულუკიანი იყო ჩართული. მან მოუწოდა პროკურატურას, რომ დაიწყოს გამოძიება ომბუდსმენის მიმართ უფლებამოსილების განხორციელების ხელისშეშლისა და ზემოქმედების ფაქტზე. პარლამენტის თავმჯდომარესა და პრემიერს კი მხარდაჭერა სთხოვა.

სპეციალური პენიტენციურ სამსახურში პასუხად განაცხადეს, რომ სახალხო დამცველის მიერ გაჟღერებული არცერთი საკანონმდებლო ნორმა არ დარღვევიათ. ომბუდსმენის პასუხად უწყება განცხადებას ავრცელებს, სადაც, ასევე, ნათქვამია, რომ ციხეში ომბდსმენის მისვლის საიდუმლოს დაცვის ვალდებულება მათ არ აქვთ.

პენიტენციურმა სამსახურმა განცხადება მას შემდეგ გაავრცელა, რაც პარლამენტში ანგარიშის წარდგენისას ნინო ლომჯარია იუსტიციის მინისტრმა, თეა წულუკიანმა გააკრიტიკა. რამდენიმე დღის წინ ომბუდსმენმა ციხეებში არსებულ მდგომარეობაზე პარლამენტს კრიტიკული ანგარიში წარუდგინა. მაშინ სხდომაზე დამსწრე იუსტიციის მინისტრმა, თეა წულუკიანმა ანგარიშს ნინო ლომჯარიას კრიტიკითვე უპასუხა და თქვა, რომ ომბუდსმენი პატიმრებს პირადად არ ხვდება. წულუკიანის თქმით, ნინო ლომჯარია საქმიანობის განმავლობაში მხოლოდ მატროსოვის ციხის რამდენიმე ცნობილ პატიმარს შეხვდა.