წარმოიდგინეთ სიტუაცია, როცა ზაფხულის შვებულებამდე რამდენიმე თვეა დარჩენილი, თქვენ კი სუსხიან და მოსაწყენ ამინდში უკვე დასვენებაზე ფიქრობთ. ასეთ დროს გამოსავალი ბარგის ჩალაგება და საბერძნეთში მოგზაურობაა. აქ თქვენს განწყობაზე ლამაზი სახლები, ფირუზისფერი წყალი და ხმელთაშუა ზღვის სამზარეულო იზრუნებს.

საბერძენთი მრავალფეროვანია, თუმცა, ამჯერად, არჩევანი კუნძულებზე შევაჩერეთ და მათგან ათი საუკეთესო ამოვარჩიეთ:

1. სანტორინი

სანტორინი ბერძნულ კუნძულებს შორის ყველაზე ცნობილია და მასზე საუბრისას, ზღვისპირა კლდეებზე გაშენებული თეთრი სახლები აუცილებლად წარმოგიდგებათ თვალწინ. სანტორინის ვიწრო ქუჩებში უამრავ კაფე-რესტორანს შეხვდებით. კუნძული ღამის ცხოვრებითაც გამოირჩევა.

მისი ბუნება და არქიტექტურა ნამდვილად თვალწარმტაცია. აქ დაგხვდებათ ვულკანური წარმოშობის შავი, თეთრი და წითელქვიშიანი პლაჟები. კუნძულის დასავლეთ მხარეს კი მდებარეობს სოფელი, საიდანაც, მზის ჩასვლის ფონზე, ცნობილი წითელი კლდეებისა და თეთრი შენობების ხედით დატკბებით.

2. მიკონოსი

მიკონოსი საუკეთესო არჩევანია მათთვის, ვისაც წვეულებები უყვარს. სანტორინის მსგავსად, მიკონოსი ცნობილია თავისი არქიტექტურით, მყუდრო პატარა ქუჩებით და ულამაზესი პლაჟებით. საინტერესოა ისიც, რომ მასობრივმა ტურიზმმა კუნძულის სილამაზეზე გავლენა არ მოახდინა და ის დღემდე ერთ-ერთ ყველაზე სასურველ სამოგზაურო ადგილად ითვლება. წვეულება ამ კუნძულზე გადამდებია და არ აქვს მნიშვნელობა, რომელი საათია, — მიკონსზე გართობის დრო ყოველთვის არის!

3. ტილოსი

მთებისა და გაუვალი გზების გამო, ეს კუნძული თავგადასავლებისა და სიახლეების მაძიებელ მოგზაურებს იზიდავს. ტილოსი საუკეთესო ადგილია მათთვის, ვინც ველური ბუნების შესასწავლად მზად არის. თუ მიკონოსზე ყოველთვის წვეულება, მუსიკა, ბევრი ხალხი და ხმაურია, ტილოსზე პირიქით, სიმშვიდე დაგხვდებათ. საბერძნეთის ამ კუნძულზე აეროპორტი არ არის, მაგრამ, აქ მოსახვედრად, კუნძული როდოსიდან, პირეოდან, მიკონოსიდან ან ათენიდან ნავით შეგიძლიათ წახვიდეთ.

4. იკარია

იკარია ეგეოსის ზღვაში, სამოსიდან დაახლოებით 20 კილომეტრში მდებარეობს. მას სახელი ბერძნული მითოლოგიური ღმერთის, იკარუსის მიხედვით დაარქვეს. ლეგენდაში ნათქვამია, რომ ის კუნძულთან ახლოს ზღვაში ჩავარდა, როდესაც კრეტადან თავის დაღწევას ცდილობდა.

გასაოცარი ხედები, პატარა ყურეები, თერმული წყლები და კუნძულის უნიკალური არქიტექტურა ძველ საბერძნეთში გამოგზაურებთ. შეიძლება, სწორედ ამ გამორჩეული ბუნების გამო ცოცხლობენ იკარიელები ძალიან დიდხანს.

5. სკიროსი

კუნძული სკიროსი ეგეოსის ზღვის დასავლეთ ნაწილში მდებარეობს. ეს ყველაზე დიდი და, ალბათ, ყველაზე მშვიდი კუნძულია საბერძნეთში.

აქ არ დაგხვდებათ ღამის ცხოვრება, თუმცა დღის განმავლობაში, კუნძულის უკეთ გასაცნობად, შეგიძლიათ ველოსიპედი ან სკუტერი დაიქირავოთ და ქუჩებში იხეტიალოთ. სკიროსის ჩრდილოეთი ნაწილი მთიანი და მწვანეა, სამხრეთი კი მშრალი და უნაყო. ეს კონტრასტი კი მოწყენის საშუალებას არ მოგცემთ.

6. გავდოსი

გავდოსი ქვეყნის სამხრეთით მდებარე კუნძულია, რომელიც ადგილობრივი ტრადიციების ერთგულებით გამოირჩევა. აქ უამრავი საოჯახო ტიპის სასტუმროა, მაგრამ ჩვენ კარვის ყიდვას და ვარსკვლავების ქვეშ სანაპიროზე დაძინებას გირჩევთ. მისი პლაჟები საბერძნეთში და ალბათ მთელ კონტინენტზეც, ერთ–ერთი ყველაზე ლამაზია.

კუნძულს ბევრი მაცხოვრებელი არ ჰყავს. თუ აქ მოხვდებით, გირჩევთ, მობილური ან ლეპტოპი სახლში დატოვოთ და რამდენიმე დღე ისე გაატაროთ, როგორც ადგილობრივები ცხოვრობენ.

7. მილოსი

სწორედ აქ აღმოაჩინეს "ვენერა დე მილოს" ქანდაკება — კლასიკური სილამაზისა და სრულყოფილების ერთ-ერთი სიმბოლო.

მილოსის პატარა კუნძული თვალწარმტაცი კლდეებითა და თეთრი ქვიშებით გამოირჩევა. კუნძულზე 70 პლაჟია და ყველა ძალიან სუფთაა. თუ მილოსზე გამგზავრებას გადაწყვეტთ, უნდა გაითვალისწინოთ, რომ ზაფხულის განმავლობაში აქ ყველაფერი უდაბნოს ჰგავს.

8. როდოსი

ეს კუნძული იდეალური ადგილია როგორც სიმშვიდის მოყვარულების, ისე თავგადასავლების მაძიებლებისათვის. კაშკაშა მწვანე ბორცვებით, ხეობებითა და ოქროსფერი პლაჟების უწყვეტი ხაზით, როდოსი ნამდვილად გამორჩეული ადგილია დედამიწაზე.

თუ შუასაუკუნეებში მოგზაურობაც გსურთ, ეს კუნძული აუცილებლად უნდა დაამატოთ სანახავი ადგილების სიას. როდოსი ერთდროულად კოსმოპოლიტური და ტრადიციულია. მისი მთავარი ღირებულება კი მრავალრიცხოვან კულტურულ და არქეოლოგიურ ძეგლებშია.

9. ზაკინთოსი

ზაკინთოსი მრავალფეროვანი სანაპიროებით, ფირუზისფერი ზღვითა და ვენეციური სტილის სასახლეებითაა ცნობილი. მისი სიმბოლო ნავაგიოს სანაპიროა, რომელსაც ყოველ წელს უამრავი ტურისტი სტუმრობს. აქვე შეხვდებით ზღვის კუებსა და ხმელთაშუა ზღვის სელაპებს. ლაჟვარდოვანი მღვმე კი აუცილებლად მოახდენს თქვენზე დაუვიწყარ შთაბეჭდილებას.

10. იდრა

ტრადიციული ქვის სასახლეები, ვიწრო ქუჩები, ლამაზი სკვერები, — დროა იდრაზე ვისაუბროთ. აქ ნახავთ ძეგლებს, ეკლესიებს, კანიონებსა და ძველი გმირების ქანდაკებებს. კუნძულის ისტორიის გასაცნობად, მუზეუმებსაც უნდა ესტუმროთ და იშვიათ საარქივო მასალებს გაეცნოთ.

აქ ყველგან სიმწვანე და უამრავი ყვავილია, ამიტომ თუ მცენარეები გიყვართ, ან უბრალოდ მშვიდ სივრცეს ეძებთ დასასვენებლად, იდრა ამისთვის საუკეთესო ადგილია.

დაიღალეთ იმის გამოცნობით, თუ როდისაა ბილეთები ყველაზე ხელმისაწვდომი? იაფი ავიაბილეთების მარტივად აღმოსაჩენად, შეგიძლიათ ავიაბილეთების კალენდარი გამოიყენოთ. კალენდარი ყველა ხელმისაწვდომ ვარიანტს გიჩვენებთ შერჩეული პერიოდისთვის და რაც უფრო მეტ თვეს აირჩევთ, მით უფრო მეტი შანსია, ბილეთებს შესაშურად იაფად გამოჰკრათ ხელი.