პატრიოტთა ალიანსის ლიდერი, ირმა ინაშვილი უკმაყოფილოა NDI-სა და IRI-ის კვლევის შედეგებით და აშშ-ს საელჩოსთან აქციას აანონსებს. ამის შესახებ მან პირად ფეისბუქგვერდზე დაწერა.

"უტყუარი მტკიცებულებები გავრცელდება ხსენებული ორგანიზაციების დანაშაულებრივი საქმიანობის თემაზე!" — წერს ინაშვილი.

ის საერთაშორისო ორგანიზაციების საქმიანობას ტერორს ადარებს, მათ ანტისახელმწიფოებრივ ქმედებებში ადანაშაულებს და NDI-ს დირექტორის წინააღმდეგ გამოძიების დაწყებას ითხოვს.

"ეს ე.წ. კვლევები პირდაპირ უქმნის საშიშროებას ჩვენს სახელმწიფოს და უკვე იქცა სახელმწიფო უსაფრთხოების პრობლემად. ტერორიზმი ყველას მოგეხსენებათ რა მოვლენაც არის. ტერორის ფორმები განსხვავებულია. პირდაპირ შემიძლია ვთქვა, რომ ის, რასაც აკეთებს NDI-სა და IRI-ს თბილისის ოფისების მენეჯმენტი ადგილობრივ ქართულ კომპანიასთან ერთად, ეს არის ტერორის ერთგვარი ფორმა", — განაცხადა მან სპეციალურად ამ საკითხისთვის მიძღვნილ ბრიფინგზე.

ინაშვილი ამტკიცებს, რომ ამ ორგანიზაციების ქართული ოფისები კვლევებსა და გამოკითხვებს აყალბებენ, რაც "ნაციონალური მოძრაობისადმი მათი პოლიტიკური მიკერძოებულობის გამო ხდება".

NDI-ს ბოლო კვლევა 16 იანვარს გამოქვეყნდა, რომლის მიხედვითაც, პატრიოტთა ალიანსს გამოკითხულთა 5% უჭერს მხარს. კვლევის მიხედვით, ხვალ რომ საპარლამენტო არჩევნები ტარდებოდეს, პარტიას ამომრჩეველთა 3% მისცემს ხმას.