2019 წლის 16 აგვისტოს ნეტფლიქსზე სერიალ Mindhunter-ის მეორე სეზონის პრემიერა შედგა და მას შემდეგ ფანები მუდმივად ელოდებიან ოფიციალურ ცნობას იმის შესახებ, თუ რას აპირებს კომპანია სერიალის გაგრძელებასთან დაკავშირებით.

ცოტა ხნის წინ უცხოურ მედიაში გავრცელდა ინფორმაცია, რომ სატელევიზიო შოუს მსახიობებს — ჯონათან გროფს, ჰოლტ მაკკელენისა და ანა ტორვის კონტრაქტი შეუწყვიტეს. შოუს გაუქმებას ოფიციალურად არ ადასტურებენ, თუმცა ფანები შიშობენ, რომ ეს ფაქტი სწორედ ამას მიუთითებს.

ამასთან დაკავშირებით ოფიციალური კომენტარი გააკეთა ნეტფლიქსის წარმომადგენელმა, რომლის თანახმადაც კომპანიას ეს სატელევიზიო პროექტი არ დაუხურავს:

"დევიდ ფინჩერი (სერიალის მთავარი პროდიუსერი) ამჟამად მისი და ნეტფლიქსის თანამშრომლობის პირველი ფილმის, Mank-ის გადაღებაზეა ორიენტირებული და ამავდროულად სერიალ Love, Death and Robots-ის მეორე სეზონზე მუშაობს. მან შესაძლოა განაახლოს მომავალში Mindhunter-ზე მუშაობა, მაგრამ ამ დროის განმავლობაში სამართლიანი არ იქნებოდა მსახიობები დაგვეყოვნებინა და სხვა პროექტებში მათი მონაწილეობა შეგვეზღუდა", — განაცხადა ნეტფლიქსის ოფიციალურმა წარმომადგენელმა.

ფოტო: Netflix

Mindhunter-ის პრემიერა 2017 წელს შედგა და ერთ-ერთ ყველაზე პოპულარულ სატელევიზიო შოუდ გადაიქცა. სერიალი ნამდვილ ამბებზე დაფუძნებით დაწერილი წიგნის — Mindhunter: Inside the FBI’s Elite Serial Crime Unit-ის მიხედვით გადაიღეს და ცნობილი ამერიკელი სერიული მკვლელების შესახებ მოგვითხრობს.

თუ გავითვალისწინებთ იმას, რომ შოუს პირველ და მეორე სეზონებს შორის ორწლიანი შუალედი იყო, სულაც არაა გამორიცხული, რომ მესამე სეზონი ერთგული მაყურებლებისთვის ცოტა გვიან, მაგრამ მაინც ვიხილოთ.

თანაც გასული წლის ნოემბერში მთავარი როლის შემსრულებელმა, ჯონათან გროფმა განაცხადა, რომ სერიალის გაგრძელებაში დიდი სიამოვნებით მიიღებს მონაწილეობას:

"ჩვენ მზად ვართ: როცა არ უნდა დაგვიძახონ, მზად ვართ მასში მონაწილეობა მივიღოთ".