ქუთაისში მომხდარ ავტოსაგზაო შემთხვევაში მონაწილე მძღოლი იდენტიფიცირებულია, თუმცა დაკავებული არ არის. შსს-ს ინფორმაციით კონკრეტული პირის პასუხისმგებლობის საკითხი მას შემდეგ დადგება, როცა ექსპერტიზის პასუხები იქნება, ამ ეტაპზე კი საგამოძიებო მოქმედებები მიმდინარეობს:

"სისხლის სამართლის კოდექსის 276-ე მუხლის პირველი ნაწილით არის დაწყებული გამოძიება , დადგენილია მძღოლის ვინაობა და მიმდინარეობს საგამოძიებო მოქმედებები".

აღნიშნული მუხლი გულისხმობს სატრანსპორტო საშუალების მოძრაობის უსაფრთხოების ან ექსპლუატაციის წესის დარღვევა მძღოლის მიერ, რამაც გამოიწვია ჯანმრთელობის ნაკლებად მძიმე დაზიანება. აღნიშნული დანაშაული ისჯება ჯარიმით, ან თავისუფლების შეზღუდვით ვადით სამ წლამდე, ანდა თავისუფლების აღკვეთით იმავე ვადით, თანამდებობის დაკავების ან საქმიანობის უფლების ჩამორთმევით ვადით სამ წლამდე, ან უამისოდ.

ფეისბუკზე გავრცელებულ ვიდეომასალაში ჩანს როგორ ეჯახება ზებრაზე გადასვლისას ავტომობილი ორ ფეხით მოსიარულეს. შინაგან საქმეთა სამინისტროში არ აქვთ ინფორმაცია დაზარალებულთა მდგომარეობის შესახებ. შემთხვევა 22 ოქტომბერს, ჭავჭავაძის გამზირზე მოხდა.

შემთხვევის ამსახველ ვიდეომასალას დავით ნიკაჭაძე, ფეისბუკის საკუთარ გვერდზე ავრცელებს:

On.ge შეეცადა გარკვევას, თუ რა ბედი ეწიათ იმ პირებს, რომლებსაც ავტომობილი დაეჯახა, ჯერჯერობით უშედეგოდ.

როგორც შემთხვევის თვითმხილველმა გვითხრა, ახალგაზრდები ჭავჭავაძის გამზირზე, საფეხბურთო კლუბ ტორპედოს სტადიონის მიმდებარედ კვეთდნენ ქუჩას, რა დროსაც მათ ვერცხლისფერი მერსედესის მარკის ავტომობილი შეეჯახა. ისინი საავადმყოფოში გადაიყვანეს.

როგორც ჩანს, შემთხვევას მსხვერპლი არ მოჰყოლია, წინააღმდეგ შემთხვევაში, სისხლის სამართლის საქმის გამოძიება სხვა, უფრო მძიმე მუხლით იქნებოდა დაწყებული.