საქართველოს ყოფილი პრეზიდენტი, მიხეილ სააკაშვილი ამბობს, რომ უკვირს მასსა და ბიძინა ივანიშვილს შორის პოპულარობაში მეტი განსხვავება რატომ არაა. ამის შესახებ სააკაშვილმა მორიგ ვიდეომიმართვაში ისაუბრა.

"მე დარწმუნებული ვარ, რომ ყველაფერი უნდა გაკეთდეს ხალხისთვის და ვაკეთებდი ყველაფერს ხალხისთვის, არაფერი არ წამიღია სახლში. ივანიშვილმა შემორაგა მთელი საქართველო და ყველაფერი მიაქვს სახლში... ამგვარად, მე მიკვირს რატომ არ არის მეტი განსხვავება ჩვენს შორის პოპულარობაში. უბრალოდ, რა თქმა უნდა, ბოლომდე ყველა ვერ ამბობს თავის სათქმელს", — აცხადებს სააკაშვილი.

NDI-ს კვლევის მიხედვით, ყოფილ პრეზიდენტს, მიხეილ სააკაშვილს გამოკითხულთა უფრო მეტი ნაწილი აფასებს დადებითად ვიდრე ქართული ოცნების თავმჯდომარე ბიძინა ივანიშვილს. კვლევაში სააკაშვილს დადებითად გამოკითხულთა 26% აფასებს, ხოლო ივანიშვილს — 17%.

ამავე კვლევის მიხედვით, ბიძინა ივანიშვილს უფრო მაღალი უარყოფითი შეფასება აქვს, ვიდრე სააკაშვილს. სააკაშვილს უარყოფითად 39% აფასებს, ივანიშვილს — 49%.