რუსული სახელმწიფო მედიის ინფორმაციით, ოკუპირებული აფხაზეთის დე ფაქტო პრეზიდენტი, რაულ ხაჯიმბა გადადგა. მედიასაშუალება აცხადებს, რომ ეს ინფორმაცია რამდენიმე წყაროსთან გადაამოწმა.

დე ფაქტო ვიცე-პრეზიდენტი, ასლან ბარციევი აცხადებს, რომ ხაჯიმბამ გადადგომის დოკუმენტს ხელი მოაწერა, რათა შენარჩუნდეს სტაბილურობა და არ დაიღვაროს სისხლი. ინფორმაცია დაადასტურა დე ფაქტო პარლამენტის თავმჯდომარე ვალერი კვარჩიამაც.

"ვფიქრობ, რომ საკითხი, ვინ შეასრულებს [სახელმწიფოს მეთაურის მოვალეობებს] ბოლომდე არ არის გადაწყვეტილი. ჯერჯერობით, ალბათ პრემიერ მინისტრი. მაგრამ ეს ჯერ კიდევ მოლაპარაკების საკითხია", — განუცხადა TASS-ს ქვარჩიამ.

ოკუპირებულ აფხაზეთში დე ფაქტო პრეზიდენტს 22 მარტს განმეორებით აირჩევენ. დე ფაქტო აფხაზეთის რესპუბლიკაში განმეორებით არჩევნებიის ჩატარება მას შემდეგ გახდა საჭირო, რაც დე ფაქტო უზენაესმა სასამართლომ ცესკოს შედეგები გააუქმა. ამ გადაწყვეტილებას წინ უსწრებდა დაპირისპირება. 6 იანვარს ოპოზიციის წევრებმა თავიანთ მხარდამჭერებს მოუწოდეს, რომ 9 იანვარს სოხუმის ცენტრალურ მოედანზე, დე ფაქტო უზენაესი სასამართლოს შენობასთან შეკრებილიყვნენ. პროტესტი უკავშირდება პრეზიდენტობის ყოფილი კანდიდატის, ალხას კვიცინიას სარჩელს, რომელიც ითხოვს, რომ აფხაზეთის საპრეზიდენტო არჩევნები შედეგები გაუქმებულიყო.

9 იანვარს ოკუპირებულ სოხუმში მოქალაქეები დე ფაქტო პრეზიდენტის ადმინისტრაციაში შეღწევას ცდილობდნენ. როგორც ეხო კავკაზა წერდა, ადმინისტრაციასთან ოპოზიცია საპროტესტო აქციას მართავდა. შენობასთან სამართალდამცავები იყვნენ მობილიზებული და დემონსტრანტების შეკავებას ცდილობდნენ.