ოკუპირებულ აფხაზეთში დე ფაქტო პრეზიდენტს 22 მარტს განმეორებით აირჩევენ. ინფორმაცია ამის შესახებ დე ფაქტო აფხაზეთის სახელმწიფო სააგენტომ გაავრცელა.

როგორც სააგენტო წერს, არჩევნების თარიღი დე ფაქტო ცესკოს დღევანდელი, 12 იანვრის გადაწყვეტილებით ჩაინიშნა.

დე ფაქტო აფხაზეთის რესპუბლიკაში განმეორებით არჩევნებიის ჩატარება მას შემდეგ გახდა საჭირო, რაც დე ფაქტო უზენაესმა სასამართლომ ცესკოს შედეგები გააუქმა. ამ გადაწყვეტილებას წინ უსწრებდა დაპირისპირება. 6 იანვარს ოპოზიციის წევრებმა თავიანთ მხარდამჭერებს მოუწოდეს, რომ 9 იანვარს სოხუმის ცენტრალურ მოედანზე, დე ფაქტო უზენაესი სასამართლოს შენობასთან შეკრებილიყვნენ. პროტესტი უკავშირდება პრეზიდენტობის ყოფილი კანდიდატის, ალხას კვიცინიას სარჩელს, რომელიც ითხოვს, რომ აფხაზეთის საპრეზიდენტო არჩევნები შედეგები გაუქმებულიყო.

9 იანვარს ოკუპირებულ სოხუმში მოქალაქეები დე ფაქტო პრეზიდენტის ადმინისტრაციაში შეღწევას ცდილობდნენ. როგორც ეხო კავკაზა წერდა, ადმინისტრაციასთან ოპოზიცია საპროტესტო აქციას მართავდა. შენობასთან სამართალდამცავები იყვნენ მობილიზებული და დემონსტრანტების შეკავებას ცდილობდნენ.