თბილისის საქალაქო სასამართლოს მოსამართლე გიორგი არევაძემ მთავარი არხის გენერალური დირექტორის, ნიკა გვარამიას საქმე აიცილა, თავად გვარამია კი სასამართლოს შეურაცხყოფისთვის 500 ლარით დააჯარიმა. ნიკა გვარამიას სააპელაციო სასამართლოს გადაწყვეტილებით 10 იანვრის სხდომაზე დასწრების უფლება მისცეს. წინა სხდომაზე ის მოსამართლე არევაძემ გააძევა.

დღევანდელი სხდომის დროს მოსამართლე გიორგი არევაძემ ნიკა გვარამიას განმარტება მოთხოვა ბრიფინგზე "მის მიმართ გაჟღერებული შეურაცხმყოფელი განცხადების" გამო. გვარამიამ მოსამართლეს უთხრა, რომ მას ანგარიშს არ ჩააბარებს, რადგან გამოხატვის თავისუფლება აქვს.

რუსთავი 2-ის კანონიერი ინტერესის საწინააღმდეგოდ უფლებამოსილების ბოროტად გამოყენების, მისი კუთვნილი დიდი ოდენობით თანხების სამსახურებრივი მდგომარეობის გამოყენებით მითვისების და ქონების მოჩვენებითი ან/და თვალთმაქცური გარიგებით გადამალვის საქმეზე პროკურატურამ გამოძიება მიმდინარე წლის 20 ივლისს დაიწყო.

ტელეკომპანიის ყოფილ დირექტორს, ნიკა გვარამიას წინასწარი შეთანხმებით ჯგუფის მიერ სამსახურებრივი მდგომარეობის გამოყენებით, დიდი ოდენობით ქონების გაფლანგვის, კომერციული მოსყიდვის, ყალბი ოფიციალური დოკუმენტის დამზადება-გამოყენების ბრალი წაუყენეს. მას, ასევე, ბრალად ედება ფულის გათეთრება.

11 აგვისტოს რუსთავი 2-ის ყოფილ დირექტორს სასამართლომ აღკვეთის ღონისძიებად 40 ათასი ლარის ოდენობით გირაო შეუფარდა და პროკურატურის ნებართვის გარეშე ქვეყნის დატოვება აუკრძალა.