ირანის საგარეო საქმეთა მინისტრი ჯავად ზარიფი ერაყში ამერიკული ბაზების დაბომბვას გამოეხმაურა და თქვა, რომ გენერალ ყასემ სოლეიმანის ლიკვიდაციის შემდეგ პროპორციულად იმოქმედეს და სიტუაციის გამწვავება არ სურთ. ამის შესახებ მან ტვიტერზე დაწერა.

"ირანმა თავდაცვისთვის პროპორციული ზომები გაეროს წესდების 51-ე მუხლის თანახმად მიიღო და იმ ბაზებზე მიიტანა იერიში, საიდანაც ირანელ მოქალაქეებსა და აღმასრულებელ პირებზე მიმდინარეობდა შეიარაღებული თავდასხმები. ჩვენ არ ვეძებთ ესკალაციას, ან ომს, მაგრამ აგრესიისგან თავს დავიცავთ", — წერს ჯავად ზარიფი.

ირანმა ერაყში მინიმუმ ორ ამერიკულ ბაზას ბალისტიკური რაკეტები ესროლა. აშშ-ის ცნობით, ამერიკული სამხედრო ბაზების მიმართულებით სულ მცირე 12 რაკეტა ისროლეს. თავდასხმა გასულ კვირას ირანელი გენერლის, სოლეიმანის ლიკვიდაციას უკავშირდება. აშშ-ს სამხედრო ძალების წარმომადგენელმა თქვა, რომ სამხედრო პირები წინასწარ გააფრთხილეს და ბაზებზე მყოფმა ჯარისკაცებმა ბუნკერებისთვის თავის შეფარება დროულად შეძლეს. დონალდ ტრამპმა აღნიშნა, რომ ჯერჯერობით ყველაფერი რიგზეა და განცხადებას ხვალ გააკეთებს.

გაიგეთ მეტი: