ირანში გენერალ ყასემ სოლეიმანის დაკრძალვისას ჭყლეტვაში 35 ადამიანი გარდაიცვალა, ხოლო 48 დაშავდა. ინფორმაციას ამის შესახებ სახელმწიფო მედია ავრცელებს.

სოლეიმანის სამგლოვიარო პროცესი მის მშობლიურ ქალაქ ქერმანში მიმდინარეობს. როგორც The Guardian წერს, მსგავსი ხალხმრავლობა 1989 წლის შემდეგ არ ყოფილა, როდესაც აიათოლა რუჰოლა ხომეინი დაკრძალეს. Associated Press-ის ინფორმაციით, გავრცელდა ვიდეოები სადაც ჩანს, რომ რამდენიმე ირანელი ქუჩაში უგონოდ იწვა და სხვები მათ დახმარებას ცდილობდნენ.

დაკრძალვის საორგანიზაციო კომიტეტის განცხადებით, ადამიანების დიდი ნაკადის გამო 7 იანვარს დაკრძალვა ვერ ხერხდება. ირანული მედია აცხადებს, რომ სოლეიმანის დაკრძალვის ზუსტი თარიღიმოგვიანებით გახდება ცნობილი.

სოლეიმანის დაკრძალვის ცერემონიალის პარალელურად ირანის რამდენიმე ქალაქში ათასობით ადამიანი ქუჩაშია გამოსული და გარდაცვლილი გენერლის ხსოვნას პატივს მიმაგებს. ისინი სკანდირებენ "სიკვდილი ამერიკას", "სიკვდილი ისრაელს".

ბაღდადის აეროპორტში აშშ-ს საჰაერო თავდასხმის შედეგად ირანელი გენერლის, ყასემ სოლეიმანის მოკვლას ახლო აღმოსავლეთში სიტუაციის გამწვავება მოჰყვა. სოლეიმანი ირანში მეორე ყველაზე გავლენიან ადამიანად მიიჩნეოდა. შეერთებული შტატების ხელისუფლება კი მას ტერორისტად და ამერიკელი სამხედროების საფრთხედ განიხილავდა. სოლეიმანის მკვლელობის შემდეგ ირანმა ბირთვული შეთანხმება დატოვა.

დაკრძალვის დღეს კუბოსთან შეკრებილ მოქალაქეებს ირანის რევოლუციური გვარდიის ლიდერმა, ჰოსეინ სალამიმ მოუწოდა მათ, გადაეწვათ ყველა ის ადგილი, რომელსაც აშშ მხარს უჭერს.