საქართველოს პატრიოტთა ალიანსის ლიდერი, დავით თარხან მოურავი მიიჩნევს, რომ საქართველოში მხოლოდ ერთხელ ჩატარდა თავისუფალი არჩევნები. ამის შესახებ მან დღეს გამართულ ბრფინგზე ისაუბრა.

დავით თარხან-მოურავის განცხადებით, არჩევნები ტოტალურად გაყალბდა და აუცილებელია დაიწყოს გამოძიება. პატრიოტთა ალიანსის მოსაზრებით ქვეყანაში სრულად უნდა შეიცვალოს საარჩევნო სისტემა:

"ვთვლით, რომ ამ საარჩევნო სისტემის არსებობის პირობებში, საქართველოს და ქართველ ხალხს არ აქვს საარჩევნო მომავალი."

დავით თარხან-მოურავის განცხადებით, არსებულმა სისტემამ საქართველოში ვერ უზრუნველყო ვერცერთი სამართლიანი არჩევნები.

"საქართველოში კომუნისტური პერიოდის შემდეგ, უფრო სწორად კომუნისტური პერიოდიდან ერთადერთი სამართლიანი არჩევნები ჩატარდა, რომელიც თავად კომუნისტურმა ხელისუფლებამ ჩაატარა და მაშინ სრულიად სამართლიანად და ღირსეულად გაიმარჯვა ზვიად გამსახურდიამ. მას მერე ქვეყანაში არ ჩატარებულა არცერთი სამართლიანი არჩევნები."

დავით თარხან-მოურავმა აღნიშნა, რომ არჩევნების შედეგების გაყალბებასთან დაკავშირებით პატრიოტთა ალიანსი საგამოძიებო პროცესებს ჩაუდგება სათავეში. გამოძიების ფარგლებში პატრიოტთა ალიანსს სურს საპარლამენტო კომისიის შექმნა და საერთაშორისო დამკვირვებლების ჩართვა.