ფინანსთა სამინისტროს შემოსავლების სამსახურმა TV პირველს, კავკასიასა და რუსთავი 2-ს ინკასო დაადო. ამით ტელევიზიებს ფინანსური ოპერაციები შეეზღუდათ.

ფინანსთა სამინისტროში არ ამხელენ, რომელ ტელევიზიებს დაადეს ინკასო. პრესსამსახურში აცხადებენ, რომ ეს კომერციული საიდუმლოა. ინკასოდადებული ტელევიზიების ზუსტი რაოდენობა უცნობია, თუმცა TV პირველის, კავკასიისა და რუსთავი 2-ის წარმომადგენელები ინფორმაციას ადასტურებენ.

"ფაქტია აღმაშფოთებელი, როცა მსგავსი რამ ახალი წლის დღეებში ხდება... 15 იანვრამდე ვითხოვეთ ვადა, არ გვიკეთებენ ამ შეღავათს, ბოროტებით არიან დაკავებული", — უთხრა On.ge-ს TV პირველის კომერციულმა დირექტორმა, ნანა აბურჯანიძემ.

რამდენიმე თვის წინ, აგვისტოში ცნობილი გახდა, რომ საქართველოში ყველაზე მაღალი შემოსავლის მქონე კერძო ტელევიზიებს რუსთავი 2-სა და იმედს და მის ჰოლდინგში შემავალ მაესტროს ბიუჯეტის მიმართ დავალიანებაც ყველაზე მაღალი ჰქონდა (რუსთავი 2 — 28 მილიონი, იმედი — 19 მილიონი, ხოლო მაესტრო 8 მილიონი). მაშინ ფინანსთა მინისტრმა ტელევიზიებს ვალების გადახდის გრაფიკის შეთანხმება შესთავაზა და თქვა, რომ მიმდინარე დავალიანება ყველა არხს უნდა დაეფარა.