ცნობილმა ამერიკელმა მსახიობმა, კევინ სპეისმა სერიალ House of Cards-ის პერსონაჟ ფრენკ ანდერვუდის როლში ტრადიციული საშობაო ვიდეო გამოაქვეყნა:

"იმედია, არ გეგონათ, რომ შესაძლებლობას არ გამოვიყენებდი, თქვენთვის შობა მომელოცა, არა?" — კითხულობს მსახიობი ფრენკ ანდერვუდის განსახიერებისას, რომელიც სერიალ House of Cards-ის ბოლო სეზონის სცენარის მიხედვით მოკვდა.

კევინ სპეისმა მსგავსი ვიდეო შარშანაც გამოაქვეყნა და მაშინ პირველად დაარღვია დუმილი სექსუალური შევიწროებისა და გაუპატიურების მცდელობის ბრალდებების შემდეგ. მსახიობი 2017 წელს ათამდე ადამინმა დაადანაშაულა სექსუალურ შევიწროებაში, მათ შორის ერთ-ერთი საქმის განხილვა სასამართლოში იმის გამო შეწყდა, რომ სავარაუდო მსხვერპლი მოულოდნელად გარდაიცვალა.

სულ ცოტა ხნის წინ გავრცელებულ ერთწუთიანი ვიდეოში მსახიობმა გასული წელიც შეაჯამა:

"საკმაოდ კარგი წელი იყო და მოხარული ვარ, რომ გამოვჯანმრთელდი. ამის გამო, ჩემს ცხოვრებაში რაღაცები შევცვალე და მინდა, რომ თქვენც შემომიერთდეთ."

კევინ სპეისის YouTube-ზე გავრცელებულ ერთწუთიან ვიდეოს KTWK ჰქვია, რაც იშიფრება, როგორც kill them with kindness — სიკეთით განაიარაღე.

"სულ მალე 2020 წელში შევაბიჯებთ და მინდა, ჩემი წვლილი მეც შევიტანო სამყაროს გაუმჯობესებაში. აჰ, ვიცი რასაც ფიქრობთ: "სერიოზულად ამბობს ამას?" მაგრამ მერწმუნეთ, ძალიანაც სერიოზული ვარ. შემდეგში, როცა ვინმე რაღაც ისეთს გააკეთებს, რაც არ მოგეწონებათ, შეგიძლიათ მაშინვე თავს დაესხათ. ან თავი შეიკავოთ და მოულოდნელად მოიქცეთ: სიკეთით უპასუხოთ და ამ გზით განაიარაღოთ", — ამბობს კევინ სპეისი ვიდეოში.