თუ შენ ან შენს ახლობელს გაქვთ სუიციდური აზრები, აუცილებლად უნდა დარეკოთ ფსიქოლოგიური დახმარების ცხელ ხაზზე.

მანდატურის სამსახურის ბაზაზე არსებული ფსიქოლოგიური საკონსულტაციო მომსახურების 24-საათიანი ცხელი ხაზი: 08 00 00 00 88;

ბავშვთა დახმარების ცხელი ხაზი: 116 111; 2 421 422;

ფსიქო-სოციალური მომსახურების ცენტრის ცხელი ხაზი: 2 200 220 (3025)

სახელმწიფო ინსპექტორის სამსახური ადასტურებს, რომ სკოლის მხრიდან არასრულწლოვანთა პერსონალური მონაცემების მოპოვების, შენახვის მათ შორის გავრცელების წესების დარღვევის ნიშნები გამოიკვეთა. ამის შესახებ სახელმწიფო ინსპექტორის სამსახურის საჯარო და კერძო სექტორზე ზედამხედველობის დეპარტამენტის უფროსმა ოთარ ჩახუნაშვილმა განაცხადა.

მისივე თქმით, პერსონალურ მონაცემთა დამუშავების ფარგლებში შეისწავლიან სკოლის ტერიტორიაზე ვიდეო თვალთვალის კანონიერებასაც.

"მაქსიმალურად შემჭიდროვებულ ვადებში ჩატარდება პერსონალურ მონაცემთა დამუშავების შემოწმების კანონიერება. ამ გადაწყვეტილების მიღების საფუძველი გახდა გამოძიების შედეგად გამოკვლეული გარემოებები, ასევე, მედია საშუალებების მეშვეობით გავრცელებული ინფორმაცია და დამატებით შედეგებს საზოგადოებას აუცილებლად ვაცნობებთ, როდესაც გვექნება აღნიშნული შედეგები", — განაცხადა ჩახუნაშვილმა.

იმის შესახებ, რომ სკოლამ არასრულწოვანთა პირადი მონაცემები დარღვევით გაავრცელა, დაკავებული გამომძიებლის, მარიანა ჩოლოიანის ადვოკატმა განაცხადა. მისი თქმით, "როდესაც მივიდნენ პოლიციის თანამშრომლები ადგილზე, სკოლის ადმინისტრაციამ დაახვედრა უკვე ამოღებული ვიდეოკამერების ჩანაწერები, ინფორმაცია ბავშვებზე, თუ ვინ შეიძლებოდა ყოფილიყო ამ კადრებზე აღბეჭდილი. ასევე, დაახვედრა ბავშვებისგან მოპოვებული ფეისბუქის პირადი მიმოწერის "სქრინშოთები".

15 წლის ბიჭი, რომელიც დაკითხვის შემდეგ კორპუსიდან გადმოხტა, 17 დეკემბერს გარდაიცვალა.

მოზარდის გარდაცვალების საქმეზე დაკავებულია გამომძიებელი, რომელსაც სისხლის სამართლის კოდექსის 335-ე მუხლით, ჩვენების მიცემის იძულებას ედავებიან.

ახალგაზრდა იურისტთა ასოციაციის განცხადებით, არასრულწლოვანმა თვითმკვლელობა, სავარაუდოდ, საგამოძიებო ორგანოს თანამშრომლების მხრიდან ფსიქოლოგიური ძალადობის გამო სცადა.

შემთხვევა 2019 წლის 11 დეკემბერს მოხდა. მანამდე მოზარდი გვიან ღამით თავისი ყოფილი სკოლის, მწვანე სკოლის შენობაში შევიდა შიდა და გარე ტერიტორიაზე წარწერები დატოვა. ამასთან დაკავშირებით სკოლამ პოლიციაში დარეკა და გამოძიება დაიწყო.