16 დეკემბერს '8000 მოსავალი"-სა და "ქართული რძის ნიშნის" ორგანიზებით ქართული ყველისა და ღვინის საღამო გაიმართა.

სტუმრებმა ქართულ ღვინოსთან ერთად დააგემოვნეს სხვადასხვა საწარმოს ნედლ რძეზე დამზადებული "ქართული რძის" ნიშნის ქვეშ გაერთიანებული 13 სახეობის ყველი. აღნიშნული ნიშნის ქვეშ წარმოებული ყველი არ შეიცავს რძის ფხვნილს ან სხვა მცენარეულ ცხიმებს და დანამატებს, გავლილი აქვს ლაბორატორიული ანალიზი და წარმოებულია სურსათის უვნებლობის სტანდარტების დაცვით.

საღამო მიჰყავდა სომელიეს ზაზა გრიგალაშვილს, რომელმაც ისაუბრა ქართული ყველისა და ღვინის შეხამებაზე.

ღონისძიებას ესწრებოდნენ საქართველოს გარემოს დაცვისა და სოფლის მეურნეობის მინისტრი ლევან დავითაშვილი, შვეიცარიის განვითარებისა და თანამშრომლობის სააგენტოს, მერსი ქორის პროექტის "კავკასიის ალიანსების პროგრამის (ALCP)", "ქართული რძის ნიშნის" პროექტის ადმინისტრაციის "საქართველოს ბიზნესის ინსტიტუტის", მარკეტინგული კომპანია GMA-ს, სავაჭრო ქსელების წარმომადგენლები და "ქართული რძის ნიშნის" მფლობელი მეწარმეები.

ლევან დავითაშვილმა ისაუბრა დარგის მიღწევებზე და რძის ინდუსტრიის განვითარებაში კერძო სექტორის აქტიური ჩართულობის მნიშვნელობაზე. მინისტრმა ქართული რძის ნიშანს სრული მხარდაჭერა გამოუცხადა და აღნიშნა, რომ სახელმწიფო დარგის განვითარებისა და ინდუსტრიის გაძლიერებისთვის ახალი რეგულაციების შემოღებას გეგმავს და შემდგომ აღსრულების მექანიზმებს გააძლიერებს.

"კავკასიის ალიანსების პროგრამის" გუნდის ლიდერმა ჰელენ ბრადბერიმ ნედლი რძით წარმოებული ყველის უპირატესობებზე და იმ საწარმოების წვლილზე ისაუბრა, რომლებიც ფერმერებისგან ნედლ რძეს იბარებენ. მანვე აღნიშნა, რომ ფერმერებისგან მიღებული რძე მიიღება ჯანმრთელი ძროხისგან, რომელიც იკვებება საძოვარზე და რძეში გადახდილი თანხა ბრუნდება ისევ თემსა და სოფელში, რაც ეხმარება ფერმერს განვითარებასა და გაძლიერებაში, განსაკუთრებით კი ქალებს, რომლებიც უფრო აქტიურად არიან ჩართულები მეცხოველეობაში. გაიზარდა იმ მომხმარებლების რიცხვიც, რომლებიც იძენენ ეტიკეტირებულ, სუფთა და უვნებელ პროდუქტს სუპერმარკეტებში, რაც დადებითად აისახება სექტორის განვითარებაზე.