თურქმენეთის პრეზიდენტმა გურბანგული ბერდიმუჰამედოვმა ძალოვანი უწყებების მინისტრები სპორტდარბაზში შეკრიბა და მათ ვარჯიშის გაკვეთილები ჩაუტარა.

ვარჯიშის ვიდეო თავდაპირველად სახელმწიფო ტელევიზიამ გაავრცელა, ოპოზიციურმა გამოცემა თურქმენეთის ქრონიკებმა კი ვიდეო გადაამონტაჟა და ჟან-კლოდ ვან დამის ფილმის, Kickboxer-ის მუსიკა და ტექსტი დაადო.

სახელისუფლებო ტელევიზიით გავრცელებულ ვიდეოში ჩანს, რომ პრეზიდენტი გენერალურ პროკურორს, შინაგან საქმეთა მინისტრს, ეროვნული უსაფრთხოების მინისტრს, საბაჟოს სამსახურის უფროსსა და კიდევ რამდენიმე პირს ავარჯიშებს. ისინი "მწვრთნელის" ინსტრუქციებსაც იწერენ.

თურქმენეთის ქრონიკებს ფეისბუქგვერდზე პრეზიდენტის ვარჯიშის ვიდეოს არაერთგვაროვანი რეაქცია მოჰყვა. ზოგიერთმა ქვეყანა ჩრდილოეთ კორეას შეადარა, ზოგმა კი აღნიშნა, რომ პრეზიდენტის ინიციატივა სასარგებლოა.

თურქმენეთის საკმაოდ რეპრესიული და ჩაკეტილი ქვეყანაა, ბერდიმუჰამედოვის რეჟიმი კი ავტოკრატიულია. ქვეყანაში უგულებელყოფილია პრესის თავისუფლება და ადამიანის უფლებები.

გურბანგული ბერდიმუჰამედოვი თურქმენეთის პრეზიდენტი 2006 წელს გახდა. მას შემდეგ მას 40-ზე მეტი წიგნი აქვს გამოცემული, მათ შორის თურქმენულ სამზარეულოზე, ნოხებზე, მუსიკაზე, გამონათქვამებზე, სამკურნალო ბალახებსა და სპორტზე. მის წიგნებს სახელმწიფო არხებზე კითხულობენ და სკოლაში ასწავლიან.

ბერდიმუჰამედოვი ხშირად წერს ვარჯიშის ვიდეოებს, რათა საკუთარ ჯანმრთელობას გაუსვას ხაზი და ოპონენტებს აჩვენოს, რომ მმართველობა ჯერ კიდევ შეუძლია.