გიტარისტი ჯონ ფრუშანტე 10-წლიანი განშორების შემდეგ ლეგენდარულ ამერიკულ როკ ბენდში, Red Hot Chili Peppers დაბრუნდა. მუსიკალური ჯგუფი მის შემცვლელ ჯოშ კლინჰოფერს ემშვიდობება.

ამის შესახებ ინსტაგრამზე ბენდის დამფუძნებელმა მაიკლ პიტერ ბალზარმა, იგივე ფლიმ დაწერა:

"Red Hot Chili Peppers ბოლო ათწლეულის გიტარისტთან, ჯოშ კლინჰოფერთან გზებს ყოფს. ჯოში მშვენიერი მუსიკოსია, რომელსაც პატივს ვცემთ და გვიყვარს. მადლიერი ვართ მასთან გატარებული 10 წლით და იმ ნიჭით, რომელიც მან ამ დროის განმავლობაში გაგვიზიარა.

ასევე სიხარულითა და აღტაცებით გვინდა გითხრათ, რომ გვიბრუნდება ჯონ ფრუშანტე. დიდი მადლობა".

ფრუშანტე 80-იანების დასაწყისში შექმნილ ჯგუფს 1989 წელს შეუერთდა. ერთი წლის შემდეგ ბენდმა სუპერპოპულარული ალბომი Mother's Milk გამოუშვა.

1992 წელს, ტურნეს განმავლობაში ფრუშანტემ ბენდი დატოვა, რისი ერთ-ერთი მიზეზი მისი ნარკოდამოკიდებულება იყო. ფრუშანტე Red Hot Chili Peppers-ში ხელმეორედ 6 წლის შემდეგ დაბრუნდა.

ფრუშანტე სოლო არტისტიცაა. მას ბენდისგან დამოუკიდებელი 14 სტუდიური ალბომი აქვს. მისი შესრულება გვხვდება პროგრესული როკ-ბენდის Mars Volta-ს ალბომებშიც.