პრეზიდენტი სალომე ზურაბიშვილი აცხადებს, რომ მოსახლეობის მხრიდან მის მიმართ უნდობლობა არ უნახავს და ამაში ხალხთან ურთიერთობამ დაარწმუნა.

"მე დავდივარ ქუჩაში, გავდივარ რეგიონებში, ვხვდები ხალხს ძალიან დიდი დოზით და ძალიან დიდი დოზით სიყვარულით. ჩემი საზომი იმის, თუ როგორ აფასებს მოსახლეობა თავის პრეზიდენტს ეს არის, და არა რაღაც კრიტიკები და ხუთკაციანი გამოსვლები. ძალიან მნიშვნელოვანია, რომ ხალხსა და პრეზიდენტს შორის ეს ურთიერთობა არ გაწყდეს და ამიტომაც სადაც საჭიროა, სალობიეშიც ვივლი, სხვადასხვა თავშეყრის ადგილებში ძალიან თავისუფლად ვივლი, ფეხით სიარულს გავაგრძელებ და ჩემს ხალხთან ვიქნები, სადაც საჭიროა და როგორც საჭიროა", — განაცხადა სალომე ზურაბიშვილმა.

პრეზიდენტ სალომე ზურაბიშვილს მისი განცხადებებისა და ქმედებების გამო ხშირად აკრიტიკებენ. ერთ-ერთი ბოლო შემთხვევა ეხებოდა პრეზიდენტის განცხადებას "არც ჯარი გვაქვს და არც გვექნება", რომელიც საზოგადოების ნაწილმა ქართული სამხედრო ძალების დაკნინებად აღიქვა. თვითონ პრეზიდენტი აცხადებს, რომ ეს მხოლოდ რიტორიკა იყო, რომელიც "აქ ნაკლებად ცნობილია".

გარდა ამისა, ნოემბრის ბოლოს, როცა რუსთაველის გამზირზე საპროტესტო აქცია იმართებოდა, პრეზიდენტი სალობიეში იყო. დემონსტრანტების ნაწილი სალობიესთან მივიდა და აქცია იქ განაგრძო.

პრეზიდენტის მიმართ ნეგატიური დამოკიდებულება საზოგადოებრივი აზრის კვლევებში აისახა. NDI-ის სექტემბრის კვლევის მიხედვით, სალომე ზურაბიშვილის საქმიანობას კარგად მოსახლეობის მხოლოდ 12 პროცენტი აფასებს. ამასთანავე, IRI-ს გამოკითხვის შედეგად, პრეზიდენტს მოსახლეობის 70 პროცენტი ნეგატიურად აფასებს.