ლონდონის სიდიდით მესამე აეროპორტი, London City Airpot რამდენიმესაათიანი შემოწმების შემდეგ უსაფრთხოდ გამოცხადდა. აეროპორტის ევაკუაცია პარასკევს საღამოს დაიწყო "ქიმიური ინციდენტის" მიზეზით, წერს BBC. მედიასაშუალების ცნობით, ადამიანთა ნაწილმა შეუძლოდ იგრძნო თავი, გაუჭირდათ სუნთქვა და ახველებდნენ.

სასწრაფო დახმარების სამსახურმა ორი პირი საავადმყოფოში გადაიყვანა, 26–ს კი ადგილზე აღმოუჩინეს დახმარება. ინციდენტის გამო მთლიანად დაიცალა აეროპორტი, ახლადჩამოფრენილი მგზავრები კი ასაფრენ-დასაფრენ ბილიკზე იყვნენ გაჩერებული.

როგორც BBC თვითმხილველებზე დაყრდნობით წერს, აეროპორტში ჩაირთო ხანძრის საგანგაშო სიგნალი. თავად აეროპორტმა ტვიტერზე დაწერა, რომ ევაკუაციის გამოცხადების მიზეზი სწორედ სახანძრო სიგნალიზაციის ჩართვა იყო.

მას შემდეგ, რაც სპეციალისტებმა აეროპორტი შეამოწმეს, ვერაფერი საეჭვო ვერ აღმოაჩინეს.