Bellingcat-მა გამოაქვეყნა ჟურნალისტური გამოძიება, რომლის თანახმად, ბერლინში საქართველოს მოქალაქე ზელიმხან ხანგოშვილის მკვლელი ვადიმ ნიკოლაევიჩ კრასიკოვია. Spiegel-თან, The Insider-თან და Dossier Center-თან ერთად ჩატარებული გამოძიებით, კრასიკოვი 1965 წლის 10 აგვისტოს დაიბადა და არა 1970 წელს, როგორც ეს მის სამოგზაურო პასპორტში წერია. Bellingcat წერს, რომ კრასიკოვი გერმანიაში მოსკოვიდან ყალბი პასპორტით ჩავიდა.

კრასიკოვი იყო მთავარი ეჭვმიტანილი 2013 წელს მომხდარი რუსი ბიზნესმენის მკვლელობის საქმეში. ჟურნალისტური გამოძიებით, 2014 წელს რუსეთმა ვადიმ კრასიკოვის ინტერპოლით ძებნა დაიწყო. ერთი წლის შემდეგ, 2015 წლის ივლისში, ინტერპოლის ცნობით, ძიება რუსეთის მოთხოვნის საფუძველზე მოხსნეს. დოკუმენტებში უთითებდნენ, რომ ეჭვმიტანილი უკვე დააკავეს. მიუხედავად ამისა, ცნობილია ისიც, რომ მოსკოვში აღნიშნულ საქმეზე გამოძიება არ დახურულა.

"ჩვენ დავადგინეთ, რომ მკვლელის პასპორტი გამოშვებულია ვადიმ სოკოლოვის სახელით, დაბადებული 1970 წლის 20 აგვისტოს. იგი არარსებულ პერსონაზეა გაცემული. ასევე დადგინდა, რომ ყველაზე ადრინდელი საიდენთიფიკაციო დოკუმენტი ამ პიროვნებაზე რუსეთის საჯარო რეესტრმა 2015 წელს გასცა, რაც იმას ნიშნავს, რომ "სოკოლოვმა" პირადობის მოწმობა 45 წლის ასაკში აიღო. "ვადიმ სოკოლოვს" გადაეცა საგადასახადო საიდენტიფიკაციო ნომერი მხოლოდ 2019 წლის ივლისში, რამდენიმე დღით ადრე, ვიდრე შენგენის ვიზაზე დარეგისტრირდებოდა. ამ ვიზით ის გაემგზავრა პარიზში, ვარშავაში და ბოლოს ბერლინში", — ვკითხულობთ ბელინგქეთის სტატიაში.

Bellingcat დაასკვნა ისიც, რომ მოქმედი პასპორტის გამოშვება, საგადასახადო ID და საერთაშორისო სამოგზაურო დოკუმენტი არარსებულ პერსონაზე ვერ გაიცემოდა რუსეთის სახელმწიფოს პირდაპირი ჩარევის გარეშე.

ხანგოშვილის მკვლელობის საქმე

საქართველოს მოქალაქე, პანკისელი ზელიმხან ხანგოშვილი გერმანიაში ველოსიპედით გამვლელმა მოკლა. იგი 23 აგვისტოს ლოცვაზე მიდიოდა, როდესაც თავში ესროლეს.

ზელიმხან ხანგოშვილმა საქართველო ორი წლის წინ დატოვა, მას შემდეგ, რაც 2015 წლის 28 მაისს, თბილისის ცენტრში, მირზა გელოვანის ქუჩაზე მძიმედ დაჭრეს. ხანგოშვილს მაშინ ოთხი ტყვია მოხვდა. გამოცემისვე ინფორმაციით, ხანგოშვილი ლაფანყურის სპეცოპერაციასაც უკავშირდება. ამასთანავე, ის რუსეთ-ჩეჩნეთის ომის მონაწილეა.