ნაციონალური მოძრაობის ერთ-ერთ ლიდერს, ზაალ უდუმაშვილს მცხეთაში მიმდინარე აქციაზე ცოცხი ესროლეს.

უდუმაშვილი მთავარ არხის პირდაპირ ეთერში ორ დეკემბერს მომხდარ მოვლენებს აფასებდა და ხელოვნურად გამოწვეულ, ილუზორულ დაპირისპირებას უწოდებდა, რა დროსაც მას ქართული ოცნების მხარდამჭერებმა ცოცხი ესროლეს.

ამ საქმეზე შინაგან საქმეთა სამინისტრომ ერთი პირი წვრილმანი ხულიგნობისა და პოლიციელის მოთხოვნის დაუმორჩილებლობისთვის დააკავა.

აქცია მცხეთის მერიასთან გუშინაც გამართეს მოძრაობა გაბედეს აქტივისტებმა. მათ პროტესტის ნიშნად 41 ვერცხლის მონეტა მიიტანეს, რასაც დაპირისპირება მოჰყვა.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.