ქართული ოცნების მაჟორიტარი დეპუტატი, დიმიტრი ხუნდაძე ამბობს, რომ სამოქალაქო აქტივისტები ყველაფერს აკეთებენ დაპირისპირებისთვის. მისი აზრით, აქციის მონაწილეები არიან ძალადობაში ჩართულები, აქვთ აგრესიული განწყობა და დესტრუქციული დავალება.

"ისინი ანგარიშს არ უწევენ არც ასაკს, არც ღირსებას, არც პატივისცემას, არც მოქალაქეობას, აბსოლუტურად არაფერს. მალულად მიდიან და აგინებენ ადამიანებს, შემდეგ იღებენ მონაწილეობას აგრესიაში და ბოლოს დაჩაგრულად წარმოაჩენენ თავს, თითქოს ისინი მშვიდობიანად მოვიდნენ, არავის არაფერს არ ეუბნებოდნენ, მხოლოდ და მხოლოდ გამარჯობის სათქმელად ჩამოვიდნენ და პასუხად მიიღეს აგრესია. თუ მოვლენ მშვიდობიანად, რა თქმა უნდა, მშვიდობიანად დახვდებიან, მაგრამ თუ აგრესიას გამოხატავენ, გარანტიას იმისას, რომ აგრესიით არ უპასუხებენ მე ვერ მოგცემთ", — თქვა დიმიტრი ხუნდაძემ TV პირველთან საუბრისას.

მაჟორიტარმა დეპუტატმა მათი მხარდამჭერების გამართლებაზე საუბრის დროს მერიის თანამშრომლებზეც ისაუბრა. მისი თქმით, გასაკვირი არაა, რომ მერიასთან აქტივისტებს საჯარო მოხელეები დახვდნენ, "თუ საავადმყოფოს ესტუმრებით ექიმები დაგხვდებიან".

ქართული ოცნების მაჟორიტარი დეპუტატი, დიმიტრი ხუნდაძე ერთ-ერთია იმ დეპუტატებს შორის, რომელმაც პროპორციულ საარჩევნო სისტემაზე გადასვლას მხარი არ დაუჭირა. გუშინ, 2 დეკებერს, მცხეთაში მის ბიუროსთან სამოქალაქო აქტივისტებმა სიმბოლურად 41 ვერცხლი მიიტანეს. ქალაქის მერი და მერიის თანამშრომლები გაბედეს აქტივისტებს სიტყვიერად დაუპირისპირდნენ, რაც შემდგომ გარეშე პირების მხრიდან ფიზიკურ დაპირისპირებაში გადაიზარდა. შინაგან საქმეთა სამინისტროს ინფორმაციით, ადგილზე 3 ქართული ოცნების, ხოლო 4 მოძრაობა გაბედეს აქტივისტი დააკავეს.