თიბისი ბანკისა და მოძრაობა ლელოს დამფუძნებელმა მამუკა ხაზარაძემ ქართული ოცნების თავმჯდომარეს, ბიძინა ივანიშვილს რუსული ავიაკომპანია აეროფლოტის ბილეთი უყიდა. ამ ფორმით უპასუხა მან ივანიშვილის იდეას ფრენების დაფინანსების შესახებ.

"ეს არ არის 35-ევროიანი ბილეთი. ეს არის ბიზნესკლასი იმიტომ, რომ ის შეჩვეულია კარგ ცხოვრებას. ამ ბილეთით მას შეუძლია დატოვოს ჩვენი ქვეყანა და ამის შემდეგ ქვეყანა დაადგება ნორმალური განვითრების გზას", — განაცხადა მან.

ტელეკომპანია იმედის ეთერში ბიძინა ივანიშვილმა განაცხადა, რომ ემიგრაცია საქართველოს პრობლემაა. მისი თქმით, დააფინანსებს იაფ ფრენებს ქუთაისის აეროპორტიდან, რომ ქართველმა ემიგრანტებმა სხვა ქვეყნებში ლეგალურად მუშაობა და ქვეყანაში დაბრუნება შეძლონ. ხაზარაძეს მიაჩნია, რომ ეს არის ნაწილი ივანიშვილის გეგმისა "საქართველო ქართველების გარეშე".

"იმ ადამიანებს, ვისაც ასე ძალიან სჭირდება სამუშაო ადგილი, ნორმალური და ღირსეული ცხოვრება ჩვენს ქვეყანაში, გაუშვებს ჩვენი ქვეყნიდან სხვაგან და დაეხმარება ჩვენს ისედაც დემოგრაფიულად კლებად ერს, მძიმე სოციალურ მდგომარეობაში მყოფ მოსახლეობას უცხოეთში დასაქმებაში. თან ამას აკეთებს ჩვენი ბიუჯეტით", — განაცხადა ხაზარაძემ მისი სასამართლო პროცესის დაწყების წინ თბილისის საქალაქო სასამართლოში.