ევროპული საქართველოს ლიდერი გიგი უგულავა, რომელიც პარლამენტის ბიბლიოთეკასთან მიმდინარე აქციიდან პოლიციამ ძალის გამოყენებით გაიყვანა, უკან ბრუნდება. უგულავას თქმით, პოლიციამ განუმარტა, რომ ის განარიდეს.

მოგვიანებით, გიგი უგულავა აქციაზე დაბრუნდა. მან თქვა, რომ მნიშვნელობა არ აქვს ვის დააკავებენ, რადგან ეს ბრძოლა ამით არ დასრულდება

"ისე აღმოჩნდა, რომ გარშემო სულ პოლიციელები მეგდგნენ, უცბად მეტაკნენ და წამიყვანეს, დანარჩენი თქვენ თვითონ ნახეთ. გზაში რა განმარტებაც გააკეთეს იყო ის, რომ თქვენ, ვინაიდან ბრძანდებით ერთ-ერთი ლიდერიო, თქვენს სიტყვას შეიძლება ესკალაცია მოჰყოლოდა და განგარიდეთო. ჩემს სიტყვას თუ რამე ესკალაცია მოჰყვებოდა ეს შეიძლება მხოლოდ და მხოლოდ კომპლიმენტად მივიღო. შევუერთდები ჩვენს მანიფესტაციას, გამოვიცვლი უბრალოდ, ისე აღმოჩნდა, რომ ყველა ღილი შემოხეული მაქვს", — თქვა გიგი უგულავამ მედიასთან საუბრისას.

უგულავა მაშინ გაიყვანეს, როდესაც ბიბლიოთეკაში იუსტიციის მინისტრი თეა წულუკიანი შედიოდა და დაპირისპირება მოხდა.

ფოტო: ანა ვახტანგაძე / On.ge

პარლამენტის ეროვნულ ბიბლიოთეკასთან საპროტესტო აქცია გრძელდება. ოპოზიციამ და სამოქალაქო აქტივისტებმა ბიბლიოთეკასთან მას შემდეგ გადმოინაცვლეს, რაც ცნობილი გახდა, რომ თეა წულუკიანი იქ შეხვედრაზე მიდიოდა.