"Apple-ს უკრაინის ტკივილი არ ადარდებს", – ასე ეხმაურება უკრაინის საგარეო საქმეთა მინისტრი იმ ფაქტს, რომ ტექნოლოგიური გიგანტი რუსეთის მოთხოვნას დაემორჩილა და რუსულ რუკაზე ყირიმი რუსეთის ნაწილად სცნო.

თუ რუსეთის ტერიტორიაზე ეფლის რუკაში ან ამინდის აპლიკაციაში ყირიმის ქალაქ სიმფეროპოლს ჩაწერთ, ეკრანზე დაეწერება: სიმფეროპოლი, ყირიმი, რუსეთი. რუსეთის ტერიტორიის გარეთ კი მომხმარებლები ქალაქის სახელს ქვეყნის დაკონკრეტების გარეშე ხედავენ.

"მოდით, თქვენს ენაზე აგიხსნით", – დაწერა ვადიმ პრისტაიკომ ტვიტერზე, – "წარმოიდგინეთ, რომ წლების განმავლობაში გაჰყვიროდეთ იმას, რომ თქვენი დიზაინი და იდეები, წლების განმავლობაში ნაშრომი და გულის ნაწილი თქვენმა დაუძინებელმა მტერმა მიითვისა, მერე კი ვინმე უცოდინარი გამოჩნდეს, ვისაც თქვენი ტკივილი ფეხებზე ეკიდება. აი, ასეთი შეგრძნება გვაქვს, როცა ყირიმს რუსეთის ტერიტორიას უწოდებთ".

რუსეთმა ყირიმის ანექსია 2014 წელს მოახდინა. ევროკავშირი და აშშ ყირიმს რუსეთის ტერიტორიად არ აღიარებენ.