ცნობილ ამერიკელ მომღერალს, მსახიობსა და სამოქალაქო აქტივისტს, სინდი ლოპერს ლგბტქ+ თემის განსაკუთრებული მხარდაჭერისთვის საპატიო ჯილდოს გადასცემენ.

თუ ამ ცნობილი არტისტის სახელი არაფერს გეუბნებათ, საკმარისია მოუსმინოთ მის ამ პოპულარულ სიმღერას და მაშინვე გაიხსენებთ მას, ან მეტიც — პირველად შეიყვარებთ.

2008 წელს სინდი ლოპერმა საქველმოქმედო ორგანიზაცია True Colors United დააარსა, რომელიც ლგბტქ ადამიანებს, განსაკუთრებით კი ამ თემის უსახლკარო წარმომადგენლებს, სხვადასხვა სახის უფასო მომსახურებას სთავაზობს: იქნება ეს განათლების, ჯანდაცვის, ტექნიკური უზრუნველყოფისა თუ იურიდიული დახმარების პროგრამები.

ამ საქველმოქმედო პროექტის ფარგლებში მომღერალი სპეციალურ კონცერტებსაც კი მართავდა, სახელწოდებით Home for the Holidays, რათა ორგანიზაციის გამართული ფუნქციონირებისათვის საჭირო თანხები შეეგროვებინა, რათა რაც შეიძლება მეტ ადამიანს ესარგებლა აუცილებელი დახმარებით.

10 დეკემბერს ლოს-ანჯელესში გაიმართება კიდევ ერთი ასეთი საქველმოქმედო კონცერტი, სადაც სინდი ლოპერს თავდაუზოგავი შრომისა და გამოჩენილი კეთილშობილების გამო High Note Global Prize-ის საპატიო ჯილდოს გადასცემენ. კონცერტში მონაწილეობას მიიღებენ ისეთი ცნობილი სახეები, როგორებიც არიან კეშა, ბილი პორტერი და მერლინ მენსონი.