რამდენიმე საათია, რაც პარლამენტთან მიმდინარე პროტესტის მონაწილეებს პოლიცია შეშას ართმევს. თავდაპირველად სამართალდამცავებმა აქციაზე მიმავალი შეშით დატვირთული მანქანები გააჩერეს, შემდეგ პოლიტიკოსებს კასრების მიტანის უფლება არ მისცეს, მოგვიანებით კი წალმის გამო აქტივისტები დააკავეს და დეპუტატები ტერიტორიიდან გაიყვანეს.

დაპირისპირება მოხდა რამდენიმე წუთის წინაც. მოძრაობა ქვეყნის სამსახურშის გავრცელებულ კადრებში ჩანს, რომ პოლიცია ისევ უწევს აქტივისტებს წინააღმდეგობას. მათი თქმით, ჩხრეკენ ყველას, ვინც პარლამენტთან მიდის.

შეშის შეტანის არაკანონიერად გამოცხადების გამო პროტესტის მონაწილეებს გასათბობად მხოლოდ ცხელი სასმელები, თამაშები და ცეკვები აქვთ.

ისინი თამაშობენ კალათბურთს, ფეხბურთსა და წრეში ბურთს.

პარლამენტის წინ ანთია ერთადერთი შეშის ღუმელი, რომელშიც აქტივისტები ქაღალდებს წვავენ.

გარდა ამისა ისინი ცეკვავენ და მღერიან.

ზოგიერთი კი პლედებით ითბობს თავს და სპეციალურად მოწყობილ ეკრანზე ფილმს უყრებს.

რამდენიმე მათგანმა შეშის ჩუმად შეტანაც შეძლო, თუმცა მალევე პოლიციამ კონტროლი გაამკაცრა.

წინააღმდეგობის შემდეგ დანთებულ ცეცხლს აქციაზე "კონტრაბანდულს" უწოდებენ.

სიცივის მიუხედავად პარლამენტთან შეკრებილები დაშლას არ აპირებენ.

შინაგან საქმეთა სამინისტრო ამტკიცებს, რომ ეს პოლიციელების მხრიდან კანონიერი ქმედება, რასაც არ ეთანხმება ომბუსმენი. მის განმარტებით, შეშის თუ სხვა რაიმე ნივთის შეკრება-მანიფესტაციაზე მიტანა მხოლოდ მაშინ შეიძლება შეიზღუდოს პოლიციის მხრიდან, თუ მათ აქვთ დასაბუთებული და გონივრული ვარაუდი, რომ არსებობს რეალური და მყისიერი საფრთხე, რომ შეშის და კასრების გამოყენება მოხდება სხვისი ჯანმრთელობის ზიანის მიყენების მიზნით.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებს ბოქლომებს ადებენ. პროტესტის მონაწილეებმა სიმბოლურად უკვე "დააბოქლომეს" პროკურატურა, სახელმწიფო უსაფრთხოების სამსახური, მთავრობის კანცელარია. ასევე, ისინი ბოქლომს ადებენ მაჟორიტარი დეპუტატების ოლქებს.

ოპოზიციამ და მათმა მხარდამჭერებმა აჭარის უმაღლესი საბჭოს ჭიშკარზე ბოქლომი ჩამოკიდეს. გარდა ამისა, ბოქლომები დაადეს პარლამენტის თავმჯდომარის, არჩილ თალაკვაძისა და დეპუტატ მიხეილ ყაველაშვილის ბიუროს ოფისებს. "დაბოქლომებულია" ასევე მთავრობის კაცელარია, პროკურატურა და პრეზიდენტის რეზიდენცია.