ახალი საქართველოს ლიდერი, გიორგი ვაშაძე ამბობს, რომ ხვალ, 26 ნოემბერს პარლამენტის პლენარული სხდომა ვერ ჩატარდება და ახლა პარლამენტის შესასვლელების პიკეტირება იწყება.

"ხალხს აქვს იმის უფლება, გზა გადაკეტოს იქ, სადაც უნდა, თუ არის შესაბამისი რაოდენობა და აქ არის ამდენი ხალხი. პიკეტირება უნდა მოხდეს მთელი ღამის განმავლობაში", — მიმართა გიორგი ვაშაძემ აქციის მონაწილეებს.

მისი თქმით, ის მოუწოდებს დეპუტატებს, არ მივიდნენ პარლამენტში.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებს ბოქლომებს ადებენ. პროტესტის მონაწილეებმა სიმბოლურად უკვე "დააბოქლომეს" პროკურატურა, სახელმწიფო უსაფრთხოების სამსახური, მთავრობის კანცელარია. ასევე, ისინი ბოქლომს ადებენ მაჟორიტარი დეპუტატების ოლქებს.

ოპოზიციამ და მათმა მხარდამჭერებმა აჭარის უმაღლესი საბჭოს ჭიშკარზე ბოქლომი ჩამოკიდეს. გარდა ამისა, ბოქლომები დაადეს პარლამენტის თავმჯდომარის, არჩილ თალაკვაძისა და დეპუტატ მიხეილ ყაველაშვილის ბიუროს ოფისებს. "დაბოქლომებულია" ასევე მთავრობის კაცელარია, პროკურატურა და პრეზიდენტის რეზიდენცია.