2019 წელი HBO-ს მაყურებლებისთვის საკმაოდ მნიშვნელოვანი გამოდგა: ვიხილეთ Game Of Thrones-ს ფინალური სეზონი და აღმოვაჩინეთ ორი ისეთი ახალი სერიალი, როგორებიცაა Chernobyl და Euphoria.

მართალია, ეს წელი ჯერ არ დასრულებულა, მაგრამ რამდენიმე დღის წინ ამ სატელევიზიო გიგანტმა უახლესი პრომო ვიდეო გამოაქვეყნა, რომელშიც ყველა ის მნიშვნელოვანი სერიალია დაანონსებული, რომელსაც HBO 2020 წელს გამოუშვებს.

აღსანიშნავია, რომ ორწლიანი შუალედის შემდეგ Westworld ტელეეკრანებზე მესამე სეზონით ბრუნდება, თანაც ორი მნიშვნელოვანი სიახლით: ახალ სეზონში ამჯერად მეორე მსოფლიო ომის თემატიკის პარკს ვიხილავთ, სამსახიობო გუნდს კი Breaking Bad-ის ვარსკვლავი, აარონ პოლი შეურთდება.

ფოტო: HBO

ასევე ოთხი წლის შემდეგ, როგორც იქნა, ვიხილავთ პაოლო სორენტინოს გახმაურებული სერიალის, ახალგაზრდა პაპის გაგრძელებას The New Pope-ს, რომელშიც ჯუდ ლოუსთან ერთად ჯონ მალკოვიჩიც გამოჩნდება.

ფოტო: HBO

2020 წელს უკვე ცნობილი სერიალების გაგრძელებებთან ერთად რამდენიმე ახალ სატელევიზიო შოუსაც ვიხილავთ, მათ შორისაა The Undoing ჰიუ გრანტისა და ნიკოლ კიდმანის მონაწილეობით და მინისერიალი I Know This Much Is True, რომელშიც მთავარ როლს მარკ რუფალო ასრულებს.