ქართული ოცნების დეპუტატი, ნუკრი ქანთარია ამბობს, რომ სამართალდამცავებმა პარლამენტის პიკეტირება მაღალი სტანდარტით დაშალეს. ამის შესახებ მან მედიაცენტრ მთავარში ისაუბრა.

"თქვენ ნახეთ, რომ, ფაქტობრივად, ბალეტის ჟანრში დაიშალა ეს პიკეტები და ბლოკირებები, იმდენად სუფთად და მაღალი სტანდარტით იყო ამ შემთხვევაში", — განაცხადა ნუკრი ქანთარია.

რაც შეეხება პარლამენტის ბლოკირების ახალ გეგმას, დეპუტატი ამბობს, რომ ეს არ გამოვა:

"მათ ახლა მოინდომონ პარლამენტის ბლოკირება, რომ სესიები არ ჩატარდეს და შეფერხდეს მუშაობა და განსაკუთრებით ვამბობ, რომ ბიუჯეტის მიღება სერიოზული რამეა. ეს უნდათ, რომ ამ სიბრტყეში გადაიტანონ... ეს ვერ გამოვა. რამდენად არიან ისინი მზად, აი, ამ ძიძგილაობისთვის ერთმანეთთან ჭყლეტისთვის, ეს სხვა რამეა".

მოძრაობა ქვეყნის სამსახურშის ლიდერმა, შოთა დიღმელაშვილმა განაცხადა, რომ 25 ნოემბერს პარლამენტის პიკეტირებას ისევ გეგმავენ. აქციის მონაწილეებს ის საღამოს 7 საათზე შეკრებისკენ მოუწოდებს.

მისი თქმით, მოქალაქეებს ოპოზიციური პარტიები მიმდინარე კვირის სამოქმედო გეგმებს თავად გააცნობენ, მოძრაობა ქვეყნის სამსახურში კი თბილისის გარეთ დაგეგმილ აქტივობებს აუქმებს.

"ჩვენ გვეგონა, რომ პროპორციული წესით არჩევნების ჩატარება უზრუნველყოფილი იყო, თუმცა, როგორც აღმოჩნდა, ჯერ ეს გვაქვს მოსაპოვებელი. ამას თბილისის გარდა ვერ მოვიპოვებთ ვერსაიდან. ესაა ეპიცენტრი, ესაა საჯილდაო ქვა, მაგრამ გვჭირდება თქვენი დახმარება. ჩვენ ვერ ჩამოვედით თქვენთან, მაგრამ თქვენ ჩამოდით ჩვენთან", — თქვა დიღმელაშვილმა.

ამჟამად პარლამენტის შენობა ბლოკირებული აღარ არის. აქციის დაშლამდე საკანონმდებლო ორგანოს შესასვლელებში გაშლილი იყო კარვები და დააწყვეს ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო. აქციის მონაწილეები ამბობდნენ, რომ შენობაში არც ერთ დეპუტატს არ შეუშვებდნენ.

18 ნოემბერს სპეცნაზმმა აქციის დაშლა და კარვების აყრა დაიწყო. სამართალდამცავებმა დემონსტრანტების წინააღმდეგ წყლის ჭავლი გამოიყენა. ამის შემდეგ ქართული ოცნების დეპუტატები პარლამენტში შევიდნენ და ბიუროს სხდომა გამართეს.

დაშლისას 37 ადამიანი დააკავეს, მათ შორის გიგა მაქარაშვილი, ზუკა ბერძენიშვილი და ზურა ჯაფარიძე. კარვების აყრის მიუხედავად პარლამენტის წინ საპროტესტო აქცია და გამოსვლები გვიან ღამემდე გაგრძელდა.

აქცია თბილისის ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა ქვეყნის სამსახურში.