ქართული ოცნების ყოფილი წევრის, თამარ ჩუგოშვილის თქმით, ის დარწმუნებული იყო, რომ პარლამენტი 2020 წლის არჩევნების პროპორციული წესით ჩატარებას მხარს დაუჭერდა. ამის შესახებ მან TV პირველის ეთერში ისაუბრა.

"სამშაბათს ეჭვი გაჩნდა უმრავლესობაში, რამე ხო არ ხდება. შემდეგ ჩატარდა ორი უმრავლესობის სხდომა, გვქონდა საუბარი, რომ თუ ეს ჩავარდება, ამას მოყვებოდა მძიმე შედეგი, მაგრამ ბოლო წამამდე მქონდა იმედი, მჯეროდა..." — ამბობს ის.

მისი თქმით, პარტიის დამფუძნებელი, ბიძინა ივანიშვილი უმრავლესობის სხდომაზე ამბობდა, რომ ხალხისთვის მიცემული დაპირება, პროპორციული წესით არჩევნების ჩატარებაზე, პარტიას უნდა შეესრულებინა.

"ბოლო წამამდე ვიყავი დარწმუნებული, რომ ეს ცვლილება გავიდოდა და იმდენად დარწმუნებული ვიყავი, რომ ტაბლოზე როცა დაიწერა კენჭისყრის შედეგები, რაღაც დროის განმავლობაში მეგონა, რომ შეცდომა იყო, მეგონა ახალი კენჭისყრა ჩატარდებოდა, უბრალოდ, ვერ ვიჯერებდი, რომ ჩავარდა", — ასე იხსენებს თამარ ჩუგოშვილი კენჭისყრის გაგების დროს.

14 ნოემბერს ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა ქვეყნის სამსახურში. ამ დროიდან თბილისში აქციები იმართება.