დღეს, 15 ნოემბერს პარლამენტის მიერ პროპორციული სისტემის პროექტის ჩაგდების მეორე დღეს, ევროკავშირის ელჩი ქართული ოცნების ცენტრალურ ოფისში მივიდა. ქართული ოცნების პრესსამსახურში აცხადებენ, რომ ელჩი პარლამენტის თავმჯდომარეს, არჩილ თალაკვაძეს შეხვდა. მისი მისვლის კადრი TV პირველმა დააფიქსირა. კარლ ჰარცელმა შესვლამდე ჟურნალისტებს უთხრა, რომ იქ კონსულტაციებისთვის მივიდა.

ქართული ოცნების განცხადებაში ვკითხულობთ, რომ პარლამენტის თავმჯდომარემ და ელჩმა პროპორციულ არჩევნებთან დაკავშირებით მიღებულ გადაწყვეტილებაზე ისაუბრეს და არსებული სიტუაცია განიხილეს:

თალაკვაძის განცხადებით, მიუხედავად იმისა, რომ პროპორციული არჩევნების 2020 წელს გადმოწევის ინიციატივამ პარლამენტში საკმარისი ხმები ვერ მიიღო, 2020 წლის არჩევნები დემოკრატიულად და სამართლიანად ჩატარდება.

ევროკავშირის ელჩი კარლ ჰარცელი საკონსტიტუციო რეფორმას გუშინ, 14 ნოემბერს გამოეხმაურა. მისი თქმით, პარლამენტში პროპორციული სისტემის კანონპროექტის ჩაგდება მოსახლეობას შორის ნდობას შეარყევს და 2020 წლის არჩევნებისთვის პოლარიზაციას გაზრდის:

"ევროკავშირი თავს იკავებდა აზრის გამოთქმისგან იმის თაობაზე, არის თუ არა პროპორციული სისტემა საუკეთესო 2020 წლის საპარლამენტო არჩევნებისთვის, რადგან ეს საქართველოს მოსახლეობისა და პოლიტიკური პარტიების არჩევანი უნდა იყოს. თუმცა, ზაფხულის განმავლობაში შედგა პოლიტიკური კონსენსუსი და საერთო ძალისხმევა, რომ მუშაობა ამ მიმართულებით გაგრძელდებოდა".

ელჩის განცხადების შემდეგ ბიძინა ივანიშვილის დაპირება არ შესრულდა. ქართულმა ოცნებამ მხარი არ დაუჭირა კანონპროექტს, რომლითაც ქვეყანაში 2020 წლის არჩევნები სრულად პროპორციული სისტემით უნდა ჩატარებულიყო. სწორედ ამ მიზეზის გამო რამდენიმე ათასი ადამიანი რუსთაველის გამზირზე შეიკრიბა.