ქართული ოცნების დეპუტატი, კახა ოქრიაშვილი აცხადებს, რომ პარტიის თავმჯდომარის, ბიძინა ივანიშვილის მხრიდან იყო სერიოზული ზეწოლა მაჟორიტარ დეპუტატებზე, განსაკუთრებთ კი დიმიტრი ხუნდაძეზე, რადგან ის ყველაზე მეტად აქტიურობდა. როგორც ოქრიაშვილი ამბობს, ხუნდაძეს პარტიიდან გარიცხვითაც დაემუქრნენ.

თვითონ ოქრიაშვილი აცხადებს, რომ მას პოზიცია არ შეუცვლია და პროექტის მიღების შემთხვევაში არც უმრავლესობის დატოვებას აპირებს. მისივე თქმით, მასზე ზეწოლა არავის განუხორციელებია.

დღეს, 13 ნოემბერს პროპორციულ საარჩევნო სისტემაზე ქართული ოცნების უმრავლესობის სხდომა ჩატარდა. ზოგიერთმა მაჟორიტარმა დეპუტატმა, მათ შორის დიმიტრი ხუნდაძემ, განაცხადეს, რომ პროექტის ჩაგდებას ეცდებიან. პროექტის კენჭისყრა სავარაუდოდ დღეს გაიმართება.

პროპორციულ წესზე გადასვლას პარლამენტმა კენჭი გუშინ, 12 ნოემბერს არ უყარა. პარლამენტის თავმჯდომარეს არ უთქვამს, რომ პროცესი გადაიდო, თუმცა, სხდომა კენჭისყრის გარეშე დაასრულა.

საკონსტიტუციო ცვლილებას მხარს უჭერდნენ ნაციონალური მოძრაობა და ევროპული საქართველო. ცვლილებას ეწინააღმდეგებოდა ქართული ოცნების რამდენიმე მაჟორიტარი დეპუტატი. უმრავლესობის ზოგიერთი წარმომადგენელი კენჭისყრის გადადებას ითხოვდა.

საპარლამენტო უმრავლესობის მიერ მომზადებული პროექტი 2020 წლის საპარლამენტო არჩევნების პროპორციული სისტემითა და ნულოვანი ბარიერით ჩატარებას ითვალისწინებს. კერძოდ, პოლიტიკური სუბიექტის მანდატების რაოდენობის დასადგენად, პარტიის მიერ მიღებული ხმების რაოდენობა 150-ზე გამრავლდება და არჩევნებში მონაწილე ყველა პოლიტიკური ძალის მიერ მიღებული ხმების ჯამზე გაიყოფა. არჩევნები ნულოვანი ბარიერის პირობებში ჩატარდება. ასევე, ახალი პროექტი საარჩევნო ბლოკების მონაწილეობის შესაძლებლობას არ ითვალისწინებს.

პროპორციული საარჩევნო სისტემა ერთ-ერთი მთავარი მოთხოვნა იყო, რომელიც მოძრაობა #სირცხვილიამ წამუყენა ხელისუფლებას მას შემდეგ, რაც რუსი დეპუტატის, სერგეი გავრილოვის ვიზიტის გამო აქციები დაიწყო. პროტესტის მეხუთე დღეს მმართველ გუნდს დათმობაზე მოუწია წასვლა. პარტიის ლიდერმა, ბიძინა ივანიშვილმა საზოგადოებას ამცნო, რომ 2020 წელს არჩევნებს პროპორციული სისტემითა და ნულოვანი ბარიერით ჩაატარებდნენ.

გაიგე მეტი: