ნაციონალური მოძრაობის დეპუტატი, რომან გოცირიძე აცხადებს, რომ საზოგადოება პროპორციული საარჩევნო სისტემის პროექტის ჩაგდებას არ შეეგუება და ეს შეიძლება, ბიძინა ივანიშვილისთვის "უკანასკნელი ტანგო აღმოჩნდეს".

დღეს, 13 ნოემბერს პროპორციულ საარჩევნო სისტემაზე ქართული ოცნების უმრავლესობის სხდომა ჩატარდა. ზოგიერთმა მაჟორიტარმა დეპუტატმა, მათ შორის დიმიტრი ხუნდაძემ, განაცხადეს, რომ პროექტის ჩაგდებას ეცდებიან. პროექტის კენჭისყრა სავარაუდოდ დღეს გაიმართება.

როგორც რომან გოცირიძე აცხადებს, პროექტის ინიცირებაც და შემგდომში ინიციატორი მაჟორიტარი დეპუტატების პროტესტიც ბიძინა ივანიშვილის დავალებით ხდება.

"როგორი გადაწყვეტილება იქნება, დამოკიდებული იქნება იმაზე, თუ რა რეაქცია მოჰყვება, მათ შორის საერთაშორისო. რომ ჩამოამწკრივა ელჩები და მოატყუა პროპორციულ სისტემაზე გადავდივარო, აბა, მივიდეს და პასუხი გასცეს. ივანიშვილის მრავალი ტყუილი მოგვისმენია, მილიარდიანი ტყუილები მოგვისმენია და ახლა ეს განსხვავებული ტყუილია, რომელიც ფულში არ გამოიხატება", — განუცხადა გოცირიძემ TV პირველს.

პროპორციულ წესზე გადასვლას პარლამენტმა კენჭი გუშინ, 12 ნოემბერს არ უყარა. პარლამენტის თავმჯდომარეს არ უთქვამს, რომ პროცესი გადაიდო, თუმცა, სხდომა კენჭისყრის გარეშე დაასრულა.

საკონსტიტუციო ცვლილებას მხარს უჭერდნენ ნაციონალური მოძრაობა და ევროპული საქართველო. ცვლილებას ეწინააღმდეგებოდა ქართული ოცნების რამდენიმე მაჟორიტარი დეპუტატი. უმრავლესობის ზოგიერთი წარმომადგენელი კენჭისყრის გადადებას ითხოვდა.

საპარლამენტო უმრავლესობის მიერ მომზადებული პროექტი 2020 წლის საპარლამენტო არჩევნების პროპორციული სისტემითა და ნულოვანი ბარიერით ჩატარებას ითვალისწინებს. კერძოდ, პოლიტიკური სუბიექტის მანდატების რაოდენობის დასადგენად, პარტიის მიერ მიღებული ხმების რაოდენობა 150-ზე გამრავლდება და არჩევნებში მონაწილე ყველა პოლიტიკური ძალის მიერ მიღებული ხმების ჯამზე გაიყოფა. არჩევნები ნულოვანი ბარიერის პირობებში ჩატარდება. ასევე, ახალი პროექტი საარჩევნო ბლოკების მონაწილეობის შესაძლებლობას არ ითვალისწინებს.

პროპორციული საარჩევნო სისტემა ერთ-ერთი მთავარი მოთხოვნა იყო, რომელიც მოძრაობა #სირცხვილიამ წამუყენა ხელისუფლებას მას შემდეგ, რაც რუსი დეპუტატის, სერგეი გავრილოვის ვიზიტის გამო აქციები დაიწყო. პროტესტის მეხუთე დღეს მმართველ გუნდს დათმობაზე მოუწია წასვლა. პარტიის ლიდერმა, ბიძინა ივანიშვილმა საზოგადოებას ამცნო, რომ 2020 წელს არჩევნებს პროპორციული სისტემითა და ნულოვანი ბარიერით ჩაატარებდნენ.

გაიგე მეტი: