ქართული ოცნების მაჟორიტარმა დეპუტატმა დიმიტრი ხუნდაძემ პროპორციულ სისტემაზე გადასვლის შესახებ საკონსტიტუციო ცვლილებების კენჭისყრამდე უმრავლესობის სხდომის მოწვევა მოითხოვა.

ხუნდაძემ განმარტა, რომ დამატებითი კონსულტაციები და განხილვა სჭირდება კენჭისყრამდე. ამაზე ფრაქციის თავმჯდომარემ, მამუკა მდინარაძემ უარი თქვა და განაცხადა, რომ ეს გააძლიერებს კანონპროექტის ჩაგდებაზე სპეკულაციებს. ქართული ოცნების დეპუტატმა, გია ვოლსკიმ დეპუტატებს თემაზე სამსჯელად კაბინეტში შეკრება შესთავაზა. პარლამენტის თავმჯდომარემ, არჩილ თალაკვაძემ კი განხილვის გადადებაზე უარი განაცხადა.

საპარლამენტო უმრავლესობის მიერ მომზადებული პროექტი 2020 წლის საპარლამენტო არჩევნების პროპორციული სისტემითა და ნულოვანი ბარიერით ჩატარებას ითვალისწინებდა. კერძოდ, პოლიტიკური სუბიექტის მანდატების რაოდენობის დასადგენად, პარტიის მიერ მიღებული ხმების რაოდენობა 150-ზე გამრავლდება და არჩევნებში მონაწილე ყველა პოლიტიკური ძალის მიერ მიღებული ხმების ჯამზე გაიყოფა. არჩევნები ნულოვანი ბარიერის პირობებში ჩატარდება. ასევე, ახალი პროექტი საარჩევნო ბლოკების მონაწილეობის შესაძლებლობას არ ითვალისწინებს.

პროპორციული საარჩევნო სისტემა ერთ-ერთი მთავარი მოთხოვნა იყო, რომელიც მოძრაობა #სირცხვილიამ წამოუყენა ხელისუფლებას მას შემდეგ, რაც რუსი დეპუტატის, სერგეი გავრილოვის ვიზიტის გამო აქციები დაიწყო. პროტესტის მეხუთე დღეს მმართველ გუნდს დათმობაზე მოუწია წასვლა. პარტიის ლიდერმა, ბიძინა ივანიშვილმა საზოგადოებას ამცნო, რომ 2020 წელს არჩევნებს პროპორციული სისტემითა და ნულოვანი ბარიერით ჩაატარებდნენ.

გაიგე მეტი: