GQ Men-ის 2019 წლის დაჯილდოებაზე 61 წლის მსახიობი შერონ სტოუნი წლის ქალის სტატუსით დააჯილდოვეს. გერმანიაში გამართულ ღონისძიებაზე სტოუნმა ჯილდოს მიღების შემდეგ ვრცელი სიტყვა წარმოთქვა და თან 1992 წლის პოპულარული ფილმიდან, Basic Instinct, ფეხის გადადების პოპულარული სცენა გააცოცხლა.

"რამდენიმე წლის წინ ვიჯექი გადასაღებ ოთახში და რეჟისორმა მითხრა: "შეგიძლია მომაწოდო შენი საცვალი? იმიტომ რომ ის კადრში ჩანს, რაც ჩვენ არ გვინდა, თუმცა მის გარეშე ვერაფერს დავინახავთ". "რა თქმა უნდა", — ვუპასუხე მე. არ ვიცოდი, რომ ეს მომენტი ჩემს ცხოვრებას შეცვლიდა.

ჩვენ უფლება გვაქვს ძლიერად ვიგრძნოთ თავი სექსუალობის იმ ნებისმიერ ფორმაში, რომელსაც ავირჩევთ. არავის აქვს ამის წართმევის უფლება. ასე რომ, მადლობა, რომ წლის ქალის ტიტული მომანიჭეთ, რადგან იყო დრო, როცა არასერიოზულად აღმიქვამდნენ", — თქვა შერონმა.

ამის შემდეგ, მსახიობმა ფილმიდან ცნობილი სცენა გააცოცხლა და აუდიტორიის წევრებსაც სთხოვა, რომ მასთან ერთად იგივე გაემეორებინათ.

1993 წელს, ფილმში შესრულებული როლისთვის შერონმა MTV-ის კინოდაჯილდოებაზე წლის საუკეთესო შემსრულებელი ქალი მსახიობისა და წლის ყველაზე სასურველი ქალის ნომინაციებში გაიმარჯვა.