ახალქალაქში ახალგაზრდა კაცს ე.წ. კასთეტებითა და ხელკეტებით სცემეს. მთავარი არხი და რუსთავი 2 ადგილობრივებზე დაყრდნობით აცხადებენ, რომ ძალადობაში პარლამენტის დეპუტატის, ენზელ მკოიანის შვილი და ძმისშვილები მონაწილეობდნენ. რუსთავი 2-ის ინფორმაციით, არსებობს მეორე ვერსიაც, რომ ნაცემია ენზელ მკოიანის ძმისშვილი.

რუსთვი 2-თან ინტერვიუში დეპუტატი ამ ინფორმაციას სიცრუეს უწოდებს და ამბობს, რომ მისი შვილები ინციდენტისას ერევანში იმყოფებოდნენ. მისივე თქმით, ძმისშვილი 17 წლისაა და ფეხზე ოპერაცია აქვს გაკეთებული, ამიტომ ჩხუბს ვერ შეძლებდა.

On.ge-ს კითხვაზე დაიწყო თუ არა გამოძიება მკოიანის შვილის მიერ სავარაუდო ძალადობაზე, შინაგან საქმეთა სამინისტროში აცხადებენ, რომ გამოძიება დაადგენს ვინ არის დამნაშავე.

საქმეზე გამოძიება სისხლის სამართლის კოდექსის 239-ე მუხლის მესამე ნაწილით დაიწყო. რაც გულისხმობს ჯგუფურ ხულიგნობას ჩადენილს ცეცხლსასროლი იარაღის ან სხვა საგნის გამოყენებით. ამ მუხლით გათვალისწინებული დანაშაული ისჯება თავისუფლების აღკვეთით ვადით ოთხიდან შვიდ წლამდე.