4 ნოემბრის საკომიტეტო მოსმენაზე, უზენაესის მოსამართლეობის კანდიდატს, ნინო ქადაგიძეს ევროპული საქართველოს დეპუტატმა, გიგა ბოკერიამ უწყებათაშორისი კომისიის მიერ აუდიოჩანაწერების გაცემის შესახებ სარჩელზე ჰკითხა. მაშინ თბილისის სააპელაციო სასამართლოს მოსამართლემ, ნინო ქადაგიძემ ენმ-ის სარჩელი არ დააკმაყოფილა. ბოკერიამ ჰკითხა, არის თუ არა საჯარო პარლამენტის საკომიტეტო მოსმენის აუდიოჩანაწერი, რაზეც მოსამართლემ უპასუხა:

"ბატონო გიგა მე ვიცნობ მაგ გადაწყვეტილებას... თქვენ ძალიან კარგად შეგიძლიათ, რომ ადამიანს აურიოთ გზა კვალი, ამის ნიჭი უდავოდ გაქვთ... ამ სხდომის აუდიო ჩანაწერი საჯარო იქნება იმ შემთხვევაში, თუ ეს არის რეგლამენტით გაწერილი და თუ ეს ჩანაწერი არის დაცული, როგორც ინფორმაცია".

საქმე ეხება ერთიანი ნაციონალურმა მოძრაობის სარჩელს, რომლითაც ისინი მოითხოვდნენ სასამართლოს კანონსაწინააღმდეგო ქმედებად ეღიარებინა ელექტრონული ინფორმაციის – იუსტიციის სამინისტროს უწყებათაშორისი კომისიის სხდომების აუდიოჩანაწერების განადგურება.

სამინისტრო უთითებდა, რომ აღნიშნულ აუდიო ჩაწერას ჰქონდა ერთჯერადი ხასიათი და გამოიყენებოდა მხოლოდ წერილობითი ოქმის შესადგენად, რის შემდეგაც დაუყოვნებლივ ნადგურდებოდა. ამასთან, სამინისტრო აპელირებდა, რომ ხსენებული აუდიო ჩანაწერების შენახვის ვალდებულება მას კანონმდებლობით არ ეკისრებოდა.